काठमाडौं । लगातार सर्भर जाम र कनेक्सन पोर्टको समस्या भोगिरहेको नेपाल स्टक एक्सचेन्जले प्राविधिक समस्या हल गर्न ७२ घण्टाको समय मागेको छ । नेप्सेको अनलाईन शेयर कारोबार प्रणाली दक्ष जनशक्ति, गुणस्तरीय सर्भर तथा उच्च क्षमताको आईपिपोर्ट नहुँदा केही दिनदेखि प्रयोगकर्ताको लोड धान्न नसकेर लगातार अबरुद्ध हुँदै आएको छ ।
नेप्सेको सर्भरमा लगातारको समस्यापछि सोमबार विहान अर्थमन्त्रालयले डाकेको छलफलमा नेप्सले समस्या समाधानको लागि ७२ घण्टाको समय मागेको हो । उक्त समयभित्र समस्या समाधान गर्ने नेप्सेले जनाएको छ । सो समस्याको हल गर्न नेप्सले दुई दिन अघि एक जना आईटी बिज्ञलाई ल्याएर मिलेर काम गरिरहेको छ । बिज्ञ थप गरेपछि आज भने समस्या आएको छैन ।
अर्थमन्त्रालयमा सोमबार भएको छलफलमा बोर्डका अध्यक्ष भिष्मराज ढुङ्गाना र नेप्सेका प्रमुख कार्यकारी अधिकारी चन्द्रसिंह साउद सहभागी थिए । नेप्सेले असोज १ गतेदेखि त्यस्तो समस्या नआउने र तीन दिन (७२ घण्टा) भित्रमा सबै प्राविधिक समस्याहरुको हल गर्ने प्रतिबद्धता जनाएको छ ।
प्रतिबद्धता अनुसार नेप्सेले आफ्नो काम सुरु गरिसकेको जनाएको छ । केही दिनदेखि लगातार नेप्सेमा आएको ह्याक भएर आएको हो वा सर्भर रहेको आईपी नै जाम गरिएको हो भन्ने खुल्न सकेको छैन । साथै नेप्सेमा प्राविधिक सेवा दिइरहेको सुबिसुको कारण पनि समस्या आएको हुनसक्ने अनुमान छ ।
नेप्सेको मुख्य सर्भरमा हार्डवयेर तथा सफ्टवयेर समस्या आएको नभई नेटवर्किङ सम्बन्धी समस्या आएको हो । नेटवर्किङ अन्तर्गत सर्भरका बीचमा कनेक्सन फेल हुने तथा डाटाहरु सही बाहिर नदिने समस्या आएको छ । साथै ब्रोकरको आईडी अटोमेटिक लगआउट गरिदिएकाले ह्याक भएको हुनसक्ने समेत अनुमान गरिएको छ । सुबिसु केवल नेटलाई दिइएको ठेक्कामा वल्र्डलिङ्क र वेभसर्फरको पोर्ट प्रयोग हुँदै आएको छ । सुबिसुले किन अन्य कम्पनीहरुको पोर्ट प्रयोग गरिरहेको छ भन्ने खुल्न सकेको छैन ।
