काठमाडौँ । नेपालको अन्तर्राष्ट्रिय उडान गर्ने एक मात्र निजि हवाई कम्पनी हिमालय एयरलाइन्सले नियमित उडानको नयाँ भाडादर सार्वजनकि गरेको छ । कोभिड–१९ को प्रभावका कारण सीमित देशहरुमा सुरक्षा मापदण्ड अपनाएर उडान भर्नु परेका कारण भाडादर सामान्य अवस्थाको भन्दा केही महंगो भएको सो एयरलाइन्सले जनाएको छ । साथै हवाई भाडा कालोबजारी हुनसक्ने भन्दै तोकिएको भाडादर भन्दा बढि भाडा लिएमा उजुरी गर्न समेत भनेको छ ।
नेपाल सरकारले सेप्टेम्बर १ देखि अन्तर्राष्ट्रिय उडान पुनः सञ्चालन गर्ने निर्णय गरे पश्चात हिमालय एअरलाइन्सले सहजै पिसिआर उपलब्ध गन्तव्यहरु चीनको छोड्ंछिडं, मलेसियाको क्वालालम्पुर र दुबईको आबुधाबीमा नियमित उडान सञ्चालन गर्न अनुमति प्राप्त गरेको छ । पिसिआर परीक्षणको उपलब्धता कठिन भएका अन्य उडान वृत्तखण्डमा सरकारको निर्णय अनुरुप नै चार्टर उडानमार्फत नेपालीलाई स्वदेश फिर्ता गर्ने कार्य सुचारु रहने कम्पनीले जनाएको छ ।
हिमालय एयरलाइन्सका महाप्रबन्धक विजय श्रेष्ठले कोभिड–१९को रोेकथामका लागि सामूहिक लडाइँमा कम्पनीले नागरिकको स्वदेश फिर्ता, कोभिड–१९ को उपचारका लागि स्वास्थ्य उपकरण तथा औषधिको ढुवानी गरी नागरिक र सरकारलाई सहयोग गरेको जानकारी दिए । हिमालयले जुन १६ देखि अगष्ट ३१ तारिखसम्म हालसम्म जम्मा ९४ वटा उद्धार उडानमार्फत १५ हजार ६३५ नेपालीलाई स्वदेश फिर्ता गरेको जनाएको छ ।
हिमालयले विदेशमा अलपत्र नेपाली स्वदेश फर्काउन विभिन्न मुलुकबाट गरिने उद्धार चार्टर्ड उडानको भाडादर सार्वजनिक गरेको छ । जसअनुरुप दमामका लागि ४६५ अमेरिकी डलर, रियादको ४६५, ढाकाको १६५, कुवेतको ३९२ डलर तोकिएको छ । त्यस्तै बहराइन्को ४१०, मालेको ४८०, सिङ्गापुरको ५२० र स्लामाबादको ३५० डरल कायम गरिएको छ ।
