काठमाडौं । नेपाल सुनचाँदी व्यवसायी महासंघले आजको लागि सुनको मूल्य स्थीर रहेको जनाएको छ । हिजो ९८ हजार ८०० रुपैयाँ प्रतितोलामा बिक्री भएको सुनको मूल्य आज तिजको दिन स्थीर रहेको हो । त्यस्तै चाँदीको प्रतितोला १० रुपैयाँ बढेर एक हजार तीन सय ७० पुगेको छ ।
तिजको समयमा धेरै मानिसले सुन किन्ने विश्वास गरिएको भएपनि कोरोना भाइरसका विरुद्धमा घोषणा गरिएको निषेधाज्ञाका कारण सबै सुन पसलहरु बन्द हुन पुग्दा सुनको कारोबार ठप्प प्रायः छ । यद्यपि राजधानी बाहिर खुलेका ठाउँमा सुनको कारोबार गर्न सहज होस् भन्ने उद्देश्यले सुनको मूल्य निर्धारण गरिएको महासंघले जनाएको छ ।
सुनको मूल्य सामान्य घटबढ भएपनि विगत दुई सातादेखि एक लाख हाराहारीमा बसिरहेको छ । लकडाउन अघि ७० हजार प्रतिदोला हाराहारीमा रहेको सुनको मूल्य कोरोना महामारीसँग विश्वभर गरिएको लकडाउनका कारण सुनको मूल्य ह्वात्तै बढेको छ । अन्तर्राष्ट्रिय बजारमा सुनको निकै बृद्धि भइसकेको छ ।
