काठमाडौं । राजधानी काठमाडौंका तीन वटै जिल्लाका स्थानीय निकायको आज बसेको संयुक्त बैठकले आगामी भदौं १५ गतेसम्म सार्वजनिक यातायात बन्द गर्न नेपाल सरकार समक्ष सिफारिस गरेको छ । काठमाडौं, ललितपुर र भक्तपुरमा रहेका नगरपालिकाका मेयरहरुको संयुक्त बैठकले राजधानीभित्रका सबै नगर प्रशासनबाट प्रवाह हुने सेवा बन्द गर्ने समेत निर्णय गरेको छ । तीन वटै जिल्लाका प्रमुख जिल्ला अधिकारी, प्रहरीको उपस्थितिमा भएको बैठकले यस्तो निर्णय गरेको कीर्तिपुर नगरपालिकाका मेयर रमेश महर्जनले बताए ।
काठमाडौंको राष्ट्रिय सभागृहमा बसेको संयुक्त बैठकले उपत्यकाभित्रका सबै नगरपालिका, वडा कार्यालय लगायतका स्थानीय सरकारको रुपमा प्रवाह हुने सेवा बन्द हुने छ ।
राजधानी उपत्यकाका तीन वटै जिल्लाभित्रका नगरका मेयरहरुको साझा संस्थाको आज बसेको बैठकले राजधानीभित्र कोभिडको संक्रमण रोक्न यस्तो कदम चाल्न हतार भइसकेको मेयर महर्जनले बताए । कोरोना भाइरसको महामारी बढेसँगै देशका विभिन्न ठाउँमा लकडाउन तथा निषेधाज्ञा घोषणा गरिएको छ । सरकारले भने औपचारिक रुपमा लकडाउन घोषणा नगरी जहाँ जहाँ समस्या देखिन्छ, त्यही त्यही सिल गर्ने, निषेधाज्ञा जारी गर्ने नीति लिँदै आएको छ ।
