काठमाडौं । कोरोना संक्रमणबाट मुक्त भई डिस्चार्ज भएका रौतहटका एक युवामा पुनः कोरोनाको आशंका गरिएको छ । गत बैशाख १४ गते नारायणी अस्पताल बीरगन्जबाट डिस्चार्ज भएका रौतहट, इशनाथ नगरपालिकाका १९ वर्षीय युवकको रिपोर्टमा कोरोना पोजेटिभ देखिएको हो । थप परिक्षण भइरहेको छ । त्यसलगत्तै उनलाई पुनः नारायणी अस्पतालको आइसोलेसन वार्डमा भर्ना गरिएको छ ।
निको भएका बिरामीको कोरोनाको स्वाव परिक्षणको लागि नमुना संकलन गरी काठमाडौंस्थित जनस्वास्थ्य प्रयोगशालामा पुनः परिक्षणको क्रममा कोरोना पोजेटिभ देखिएको हो । गत वैशाख १ देखि नारायणी अस्पतालको आइसोलसन वार्डमा भर्ना भएका उनको वैशाख १० र १३ गते दुई पटक गरिएको परिक्षणमा कोरोना भारइस नेगेटिभ आएपछि वैशाख १४ मा डिस्चार्ज गरिएको थियो ।
डिस्चार्ज भएर घर गएपछि परिवारका सदस्यहरुसँग बस्दै आएका ति युवामा पुनः कोरोना देखिएको छ । नेपालमा कोरोना संक्रमितमा दोहोरिएको घट्ना पहिलो पटक हो । नेपालमा रहेको कोरोना संक्रमित मध्ये १६ जना निको भई घर फर्केकामा उनी मात्रै पुनः अस्पताल भर्ना भएका कोरोना संक्रमित हुन् ।
