काठमाडौं । विश्वभर महामारीको रुपमा फैलिरहेको कोरोना भाइरसको संक्रमण रौतहटमा देखिएको छ । रौतहटका दुई जनामा कोरोना संक्रमणको पुष्टि भएको स्वास्थ्य तथा जनसंख्या मन्त्रालयले जनाएको छ । यससँगै कोरोना संक्रमितको कूल संख्या ५४ पुगेको छ ।
काठमाडौंको टेकुस्थित जनस्वास्थ्य प्रयोगशालामा स्वाव परिक्षणको क्रममा रौतहटका दुई जनामा कोरोनाको संक्रमण देखिएको हो । रौतहटस्थित बृन्दावन नगरपालिका ९ भुहा र दवाही गोनाही नगरपालिका १ का एक।एक जना पुरुषमा कोरोनाको संक्रमण देखिएको हो । संक्रमित २५ बर्षिय पुरुष १४ दिन रौतहटकै स्थानीय एक क्वारेन्टाईनमा बसेर घर फर्केको व्यक्ति भएको जनाइएको छ । त्यस्तै अर्का ३५ बर्षिय व्यक्ति भने हालसम्म पनि क्वारेन्टाईनमै छन् । उनलाई आईशोलेशनमा सारेर थप उपचार गरिने प्रयास भइरहेको छ । त्यस्तै घर पुगेका युवाको खोजी सुरु भएको छ ।
रौतहटमा आज पुष्टि भएको थप दुई जनासहित कूल संक्रमितको संख्या ५४ पुगेको छ । सोमबार कोरोना रोगी बढेका थिएनन् भने आइतबार ५२ रहेको थियो ।
