काठमाडौं । नेपाल सरकारले भन्सार नाकालाई कडाई गर्ने भएको छ । कोभिड–१९ का कारण मुलुकको राजस्व संकलनमा धक्का लागेपछि सरकारले आगामी दिनमा राजस्व बढाउन भन्सार नाकालाई कडाई पार्ने तयारी गरेको हो ।
अर्थ मन्त्रालयले भन्सार विभागलाई १८बुँदे निर्देशन दिँदै तोकिएको लक्ष्य पूरा गर्न वैकल्पिक कार्ययोजना तयार गरी भन्सार कसिलो पार्न निर्देशन दिइएको छ । अधिकांश भन्सार कार्यालयले तोकेको राजस्वको लक्ष्यभन्दा कम राजस्व संकलन गरेको निष्कर्ष निकाल्दै अर्थ मन्त्रालयले बाँकी चालू आवको अवधिमा भन्सार कसिलो पार्न निर्देशन दिएको हो ।
बजारमा केही विदेशी वस्तुको उपलब्धता पर्याप्त भए तापनि त्यस्ता मालवस्तु वैध तरीकाले पैठारी नभएको भन्ने सरकारी अधिकारीको ठम्याइ छ । अस्वाभाविक रूपमा पैठारी घटेका मालवस्तुहरूको आपूर्ति सहज भएको पाइएमा अन्य निकायसँग समन्वय र सहकार्य गरी बजारमा हस्तक्षेप गर्ने रणनीति अवलम्बन गर्नसमेत भन्सार विभागलाई अर्थ मन्त्रालयले निर्देशन दिएको हो ।
मालवस्तुको घोषणा स्पष्ट र वास्तविक नपाइएमा विभागबाटै अनलाइन मोनिटरिङ गरी आर्थिक ऐनको प्रावधानअनुसार कारबाही गर्न अर्थ मन्त्रालयले विभागलाई निर्देशन दिएको छ ।
त्यस्तै, अर्थ मन्त्रालयले चोरी पैठारीलाई निरुत्साहित गर्न भन्सार कार्यालयमा खटिएको सुरक्षा बललाई भन्सार कार्यालयको नेतृत्व, रेखदेख र नियन्त्रणमा प्रभावकारी रूपमा परिचालन गर्नसमेत निर्देशन दिएको छ ।
