काठमाडौं । गएराति परेको चट्याङबाट धादिङको सिंगो बस्तीमा हाई भोल्टेज प्रवाह हुँदा दुई जनाको मृत्यु भएको छ । धादिङ जिल्लाको थाक्रे गाउँपालिका–३ बालुवाखर्कमा गएराति परेको चट्याङका कारण सो गाउँका दर्जनभन्दा बढि घरमा हाई भोल्टेज गएको हो । चट्याङपछि प्रवाह भएको उच्च भोल्टका कारण सातजना घाइते भएका छन् ।
मृत्यु हुनेमा २४ वर्षीय सागर अर्याल र ५० वर्षीया सानुमान तामाङ छन् । अन्य घाइतेहरुको उपचारको लागि काठमाडौंस्थित ट्रमा सेन्टरमा ल्याइएको छ ।
चट्याङपछि विद्युतको तारमा हाईभोल्जेट आएको र त्यसले सो क्षेत्रका अधिकांश घरहरुमा आगो लागेको स्थानीयबासी राजु अर्यालले बताए । लेक मल्डुङ र बेँसीमल्डुङ तथा बालुवाखर्कका स्थानीयबासीको घरहरुमा हाई भोल्टेज प्रवाह भएको थाक्रे गाउँपालिकाका निमित्त प्रशासकीय अधिकृत शेषकान्त पौडेलले बताए । सो वडाका वडाअध्यक्ष अमित घलेका अनुसार क्षतिको विवरण संकलन गर्ने कार्य भइरहेको छ ।