काठमाडौं । आज अपरान्ह भक्तपुरमा डरलाग्दो दुर्घटना भएको छ । सिमसिम पानी परेको समयमा ब्रेक लगाउन न्यूनतम दुरी कायम गर्न नसक्दा छ वटा सवारी साधन आपसमा ठोक्किएर दुर्घटना भएको हो । घटनामा करिब एक दर्जन घाइते छन् । उनीहरुको स्थानीय अस्पतालमा उपचार भइरहेको प्रहरीले जनाएको छ ।
स्थानीय प्रत्यक्षदर्शीका अनुसार भक्तपुरको चुनदेवीस्थित सडकमा डरलाग्दो दुर्घटना भएको हो । स्थानीय प्रत्यक्षदर्शी राजु कुटुका अनुसार सिमसिम पानी परेको सडकमा सुरुमा भ्यानले बाइकलाई ठक्कर दिएको थियो । त्यसलगत्तै पानीले भिजेको सडकमा मोबिल पोखियो । लगत्तै पछाडि आइरहेका कार, बसलगायतका सवारी साधनहरु आपसमा ठोक्किएर दुर्घटनामा परेका हुन् ।
दुर्घटनामा परेकाहरुलाई तत्कालै उद्धार गरिएको छ । क्षतिको विवरण संकलन गर्ने काम भइरहेको प्रहरीले जनाएको छ । घटनामा लाखौं रुपैयाँको बीमा दावी पर्ने देखिएको छ । महंगा गाडीमा क्षति पुगेकाले १० लाख भन्दा माथिको बीमा दावी पर्ने प्रारम्भिक अनुमान गरिएको छ ।
