काठमाडौं । कोरोनाबाट त्रासबाट नेपाललाई सुरक्षित राख्ने अभियानमा रहेको सरकारले भारतसँगको सीमा नाकाबाट सर्वसाधारणको आवत जावत बन्द गर्ने तयारी गरिरहेको छ । यसैबीच, आजदेखि मध्ये नेपालको भारतसँग जोडिएको सीमा नाका जमुनाहा बन्द गरिएको छ ।
कोरोना भाइरस संक्रमण नेपालतर्फ फैलिन नदिन बाँके जिल्लाको मुख्य नेपाल–भारत सीमानाका जमुनाहमा सवारीसाधन सञ्चालनमा पूर्णरुपमा रोक लगाइएको छ । साथै सर्वसाधारणको आवत जावत समेत न्यून छ ।
भारतको उत्तर प्रदेशमा कोरोना रोगी बढ्दै जाँदा सीमा नाका बन्द गरिएको हो । दुवै देशका सुरक्षार्मीबीचको बैठकपछि यस्तो निर्णय गरिएको हो ।
नेपालतर्फ चौलिक्का चोकसम्म मात्र सवारीसाधन सञ्चालन गर्न दिइएको छ । सवारीसाधन सचालनमा रोक लगाए पनि पैदल आवातजावत भने यथावत रहेको बाँकेका प्रमुख जिल्ला अधिकारी कुमारबहादुर खड्काले जानकारी दिए । उनका अनुसार नेपालगन्ज बाहेकका अनौपचारिक नाकाहरु सबै बन्द गरिएको छ । खुला सीमाको कारण दुई देशका बीचमा निगरानीरहित मानिसहरु ओहोर दोहोर हुनसक्ने हुँदा सबैलाई नियमनको दायरामा ल्याउन यस्तो निर्णय गरिएको हो । स्थानीय नेपालगन्ज नाका भने खुल्ला छ । त्यहाँ हेल्थ डेस्क सहितको कडा चेकजाँचपछि मात्रै नेपालतर्फ प्रवेश गर्न दिइएको प्रमुख जिल्ला अधिकारी खड्काले जानकारी दिए ।
तस्विर सौजन्यः भगतराम थारु/नेपालगन्ज न्यूज
