काठमाडौं । प्राण घातक कोरोनाबाट अमेरिकामा मृत्यु हुनेको संख्या छ जना पुगेको छ । विश्वकै प्रविधियुक्त देश भनेर दावी गर्ने अमेरिकामै मानिसहरु कोरोनाबाट असुरक्षित भएपछि विश्वभर कोरोनाको नयाँ आतंक फैलिन पुगेको छ ।
युरोप र अमेरिकामा समेत कोरोना भाइरसले बितण्डा मच्चाउन थालेपछि विश्व स्वास्थ्य संगठनले कोरोनाबाट विश्वको कुनै पनि ठाउँ सुरक्षित नभएको घोषणा गरेको छ । अमेरिका तथा युरोपका कैयौं शहरहरुलाई लकडाउन गरिएको छ भने दैनिक उपभोग्य बस्तुहरुको अभाव हुन थालेको छ ।
उता, दक्षिण कोरियाले कोरोना भाइरसका विरुद्धमा युद्ध घोषणा गरेको छ । दक्षिण कोरियामा संक्रमितको संख्या पाँच हजार नाघेको छ भने मृत्यु हुनेको संख्या तीन दर्जन नजिकै छ । दक्षिण कोरियाले धेरै शहरहरु लकडाउन गरिसकेको छ भने सफाई तथा औषधी छर्कने काम तीव्र पारिएको छ । दक्षिण कोरियाले युद्ध घोषणा गरे लगत्तै उत्तर कोरियाले पनि देशलाई लकडाउनको घोषणा गरेको छ ।
उता, अष्ट्रेलियाका प्रधानमन्त्रीले आम सर्वसाधारणलाई लाइन लागेर डिपार्टमेन्टल स्टोरको सामान भण्डारण नगर्न आग्रह गरेका छन् । पहिलो कोरोना भाइरस भेटिएको भालिपल्टदेखि नै अष्ट्रेलियाको पसलहरुमा सामान अभाव हुन थालेपछि प्रधानमन्त्रीले नै यस्तो आग्रह गरेका हुन् ।
पछिल्लो पटक बुहानमा कोरोना भाइरसको उपचारमा संलग्न थप एक चिकित्सकको मृत्यु भएको छ । मंगलबार उनको वुहानस्थित अस्पतलामा निधन भएको चिनियाँ समाचार संस्थाले जनाएको छ ।
