काठमाडौं । अपि पावर कम्पनी लिमिटेडले १६औं वार्षिक साधारण सभा चैत ७ गते गर्ने भएको छ । उक्त सभा कार्की बैंक्वेट, माईतीघर, काठमाडौंमा बिहान ११ बजे शुरु हुने जनाएको छ । कम्पनीको फागुन १२ गते बसेको सञ्चालक समितिको बैठकले सभा गर्ने निर्णय गरेको हो ।
साधारण सभा प्रयोजनको लागि कम्पनीले चैत १ गतेदेखि ७ गतेसम्म शेयरधनी दर्ता पुस्तिका बन्द गर्ने भएको छ । चैत ६ गतेसम्मका कायम शेयरधनीले मात्र सभामा भाग लिन पाउनेछन् ।
सभाको विशेष प्रस्तावमा गत आर्थिक वर्षको मुनाफाबाट ५ प्रतिशतका दरले बोनस शेयर (कर बाहेक) वितरण गर्ने र आर्थिक वर्ष २०७४/७५ को चुक्ता पूँजीको १ बराबर शून्य दशमलव ४६७६५ का दरले हकप्रद शेयर निष्कासन गर्ने प्रस्ताव पारित गर्नेछ ।
साथै, कम्पनीले बोनस तथा हकप्रद शेयर निष्कासन पश्चात कायम हुने चुक्तापूँजीको १ बराबर शून्य दशमलव ९०९६ (१ः०. ९०९६) का दरले हकप्रद शेयर निष्कासन गर्न स्वीकृति प्रदान गर्नेछ ।
सभामा कम्पनीको प्रबन्धपत्र र नियमावलीमा संशोधन गरी अग्राधिकार शेयर सम्बन्धी व्यवस्था गर्ने, ५ जना सञ्चालकहरुको निर्वाचन गर्ने र हकप्रद निष्कासनबाट प्राप्त हुने रकम कम्पनीले निर्माण गरिरहेको ४० मेगावाट क्षमताको माथिल्लो चमेलिया जलविद्युत आयोजनामा थप लगानी गर्ने लगायतका विषयमा छलफल लगायतका एजेण्डा रहेका छन् ।
