काठमाडौं । अन्तर्राष्ट्रिय सञ्चार माध्यमहरुले चीनमा फैलिएको कोरोना भाइरस सिंगो चीनभरि नै फैलिएको दावी गरेका छन् । वुहान प्रान्तबाट फैलिएको झण्डै दुई साताभित्रैमा कोराना भाइरस सिंगो चीनभर फैलिएको अन्तर्राष्ट्रिय सञ्चार माध्यमहरुले जनाएका हुन् । कोरोना भाइरसको फैलनेक्रम यति तीव्र रुपमा बढेको छ कि तीन दिनअघि तीन हजार रहेको संक्रमितको संख्या बुधबार साँझसम्म आठ हजार पुगिसकेको छ भने तीन दिनमा ४० जना मृतकको संख्या बढेर १७० नाघिसकेको छ ।
कोरोना भाइरसको संक्रमण रोक्न राष्ट्रपति सि जिनपिङले केन्द्रीय समितिको बैठक बोलाएर चिनियाँ जनमुक्ति सेनालाई सो भाइरसबाट जनतालाई सुरक्षित बनाउन निर्देशन दिइसकेका छन् । चीनले ४८ घण्टाभित्रैमा कोरोना भाइरसको उपचारको लागि अस्पताल नै बनाएर उपचार गरी कोरानो भाइरस विरुद्धमा राष्ट्रिय अभियान चलाउँदा समेत रोकथाम भएको विश्वका अन्य देशहरुमा फैलिएमा अवस्था के होला ? प्रश्न उब्जिएको छ ।
बीबीसीका अनुसार चीनमा कोरोना भाइरसबाट मर्नेको संख्या १७० पुगिसकेको छ भने झण्डै आठ हजारलाई यो रोगले समातिसकेको छ । कोरोना भाइरसको कारण चीनमा सार्वजनिक यातायात र कार्यालयहरु बन्द गरिएको छ भने कतिपय हवाई यातायात समेत स्थगित गरिएको छ ।
उता, संयुक्त राष्ट्रसंघले विश्वभर कोरानो भाइरस फैलिन सक्ने चेतावनी दिँदै सचेतना अपनाउन अपिल जारी गरेको छ । मानिसबाट मानिसमा सजिलै सर्ने कोरोना रोग जर्मनी, भियतनाम र जापानमा पनि विशाल रुपमा फैलिन सक्ने भन्दै संयुक्त राष्ट्र संघीय निकाय विश्व स्वास्थ्य संगठनले सचेत रहन चेतावनी दिएको छ ।
नेपाल, श्रीलंकासहित विश्वका १५ देशमा फैलिईसकेको कोरोना भाइरस विश्वभर चीनमा जसरी फैलिएमा लाखौं मानिसको ज्यान जाने चेतावनी अन्तर्राष्ट्रिय स्वास्थ्य एजेन्सीहरुले दिएका छन् । यद्यपि नेपालमा चीनबाट आएका एक जना नेपालीलाई संक्रमण देखिएपनि उनी निको भइसकेका छन् ।
