कठमाडौं । गत चार महिनामा विदेशमा रहेका नेपालीहरुले पसिना बगाएर कमाएको तीन खर्ब चार अर्ब रुपैयाँ स्वदेश भित्राएका छन् । नेपाल राष्ट्र बैंकले आज चार महिनाको देशको आर्थिक स्थिति सार्वजनिक गर्दै यस्तो विवरण बाहिर ल्याएको हो । चालु आर्थिक वर्षको प्रथम चौमासिकभित्रै विदेशमा बसेर आर्जन गर्ने नेपालीले ३ खर्ब ४ अर्ब ९७ करोड रुपैयाँ रकम औपचारिक माध्यमबाट स्वदेश पठाएको केन्द्रीय बैंकको वित्तीय विवरणमा उल्लेख छ ।
नेपाल राष्ट्र बैंकका अनुसार चालु आर्थिक वर्ष २०७६/७७ को साउन, भदौ, असोज र कात्तिक (चार महिना) मा उक्त रकम औपचारिक माध्यमबाट भित्रिएको हो । सो अधवीमा विदेश जाने नेपालीको संख्या ५ प्रतिशतले बढेको छ । तर रेमिट्यान्स भित्रने क्रमको बृद्धिदर भने २.३ प्रतिशतले घटेको देखिएको छ । गत वर्षको सोही अवधिमा विप्रेषण आप्रवाह ३६.४ प्रतिशतले बढेको थियो ।
पुनः श्रम स्वीकृतिका आधारमा वैदेशिक रोजगारीमा जाने नेपालीको संख्या यो वर्ष ९.१ प्रतिशतले बढेको छ । विदेश जानेको संख्या बृद्धिसँगै बीमा कम्पनीहरुले म्यादी बीमा बापतको बीमा शुल्कमा पनि बृद्धि भएको छ ।
