काठमाडौं: माछापुच्छ्रे बैंकले यूके एड सक्षम एक्सेस् टु फाइनान्सको सहयोगमा वित्तीय साक्षरता कार्यक्रम सञ्चालन गर्न रियान्डा बिजसर्भ (फिनलिटसँगको संयुक्त सहकार्यमा) सँग सम्झौता गरेको छ ।
सम्झौता पत्रमा बैंकका तर्फबाट प्रमुख कार्यकारी अधिकृत सुमन शर्मा, रियान्डा बिजसर्भका तर्फबाट प्रवन्ध निर्देशक भरत रिजाल र फिनलिटको तर्फबाट प्रबन्ध निर्देशक प्रकाश कोइरालाले संयुक्त रुपमा हस्ताक्षर गरे ।
सम्झौतासँगै बैंकले तोके बमोजिमका वित्तीय साक्षरता सम्बन्धी सम्पूर्ण कार्य रियान्डा बिजसर्भ (फिनलिटसँगको संयुक्त सहकार्यमा) ले गर्नेछ । सम्झौताको कार्यान्वयन पश्चात् नेपालको वित्तीय साक्षरता न्यून रहेका ११ जिल्लामा बैंकले वित्तीय साक्षरता सम्बन्धी कार्यक्रम गर्ने लक्ष्य राखेको छ ।
बैंकले वित्तीय साक्षरता कार्यक्रम अन्तर्गत वित्तीय साक्षरता सम्बन्धी तालिम, श्रव्य–दृश्य प्रस्तुती, नाटक–कथा मञ्चन, किताब र पढ्ने सामग्री वितरण कार्य गरिने जनाएको छ ।
बैंकले देशभर ८६ वटा शाखा, २ वटा एक्स्टेन्सन काउन्टर लगायत २५ शाखारहित बैंकिङ्ग सेवा समेत गरी १ सय १३ स्थानबाट ग्राहक महानुभावमा सम्पूर्ण बैंकिङ्ग सुविधा प्रदान गरिरहेको छ । बैंकको देशभर ९९ वटा एटीएम सञ्चालनमा रहेका छन् ।
