काठमाडौं । प्रधानमन्त्री केपी शर्मा ओलीले आज गर्ने भनिएको मन्त्रिमण्डल पुनर्गठन स्थगित हुने भएको छ । सोमबार मन्त्रिमण्डल पुनर्गठन गर्ने र सोको लागि नयाँ मन्त्रीहरु कस कसलाई बनाउने सम्बन्धमा तीव्र दौडधुप चलिरहेकै बेला प्रधानमन्त्री ओलीले आजको लागि तोकिएको मन्त्रिमण्डल पुनर्गठन स्थगित गरएको बालुवाटार स्रोतले जनाएको छ ।
मौजुदा मन्त्रिपरिषदमा रहेका सदस्यहरुले प्रभावकारी काम गर्न नसकेको भन्दै पार्टीभित्रबाट चर्को आलोचना भइरहेको बेला प्रधानमन्त्री केपी शर्मा ओलीले मन्त्रिमण्डल पुनर्गठन गर्ने प्रक्रिया अघि बढाएका थिए ।
आइतबार बसेको नेपाल कम्युनिष्ट पार्टी (नेकपा) को सचिवालय बैठकमा मन्त्रिमण्डल पूनर्गठन गर्ने निर्णय समेत भएको थियो । सो बमोजिम सोमबार आफ्नातर्फबाट मन्त्रि बनाउनेहरुको सूचि बोकेर प्रचण्ड बालुवाटार पुगेपनि छलफल अझै जारी राख्नुपर्ने भएकोले आजको लागि तोकिएको मन्त्रिमण्डल पुनर्गठन स्थागित गरिएको जनाइएको छ ।
सोमबार साँझसम्म मन्त्रिमण्डल पुनर्गठन गर्ने तयारी गरेको भनिएपनि प्रधानमन्त्रीले शीर्ष नेताहरुसँग छलफल जारी राखेकोले आजै नगर्ने र एक दुई दिनपछि सारिएको जनाइएको छ ।