काठमाडौं । आजदेखि म्यानमार भ्रमणमा निस्कन लागेकी राष्ट्रपति विद्यादेवी भण्डारीले शितलनिवासस्थित राष्ट्रपति भवनबाट त्रिभुवन अन्तर्राष्ट्रिय विमानस्थलसम्म जान हेलिकोप्टर चढेकी छिन् ।
आज विहान १०ः३० बजेको उडानमार्फत म्यानमारतर्फ प्रस्थान गर्न विमानस्थल जान नेपाली सेनाको हेलिकोप्टर चढेर गएको राष्ट्रपति कार्यालयले पुष्टि गरेको छ । राष्ट्रपति कार्यालयका प्रेस सल्लाहकार श्रीधर गौतमले आज विहान पौने १० बजेतिर नेपाली सेनाको हेलिकोप्टर चढेर राष्ट्रपति विद्यादेवी भण्डारी विमानस्थल पुगेको पुष्टि गरेका छन् ।
सडकबाट सवारी चलाउँदा ट्राफिक जाम भई सर्वसधारणले सास्ती पाउने तथा दशैंको समयमा भ्याली बाहिर परिचालन भएका ट्राफिक प्रहरीहरु भ्याली भित्र आईनपुगेका कारण सुरक्षा संवेदनशीलतालाई ध्यान दिई हेलिकोप्टर चढेको बताइएको छ ।
