काठमाडौं । एनएमबि माइक्रोफाइनान्सले चुक्ता पुँजि बृद्धिको लागि निष्काशन गर्न लागेको १५० प्रतिशत हकप्रदको लागि नेपाल धितोपत्र बोर्डबाट आवश्यक प्रक्रिया अघि बढाउन अनुमति पाएको छ ।
एनएमबि माइक्रोफाइनान्सले १ बराबर १ दशमलब ५ को अनुपातमा एक सय रुपैयाँ अंकित दरले २४ लाख ३० हजार ९३ कित्ता हकप्रद निष्काशनको स्वीकृतीको लागि बोर्डमा आवेदन दिएको थियो । बिहिवार बोर्डबाट सो आवेदन स्वीकृत भएको कम्पनीले जनाएको छ ।
माइक्रोफाइनान्सको २०७५ पुस २९ गते सम्पन्न साधारण सभासभाले चुक्ता पुँजीको १५० प्रतिशत हकप्रद शेयर बिक्री गर्ने निर्णय गरेको थियो । सो हकप्रद निष्काशनको लागि कम्पनीले राम्रो रेस्पोन्स भने पाउने छाँटकाँट छैन । क्रेडिट रेटिङ एजेन्सी इक्रा नेपालमा रेटिङ गराउँदा ग्रेड ४ रेटिङ पाएको एनएमबि माईक्रोफाइनान्समा थप पुँजि लगानी गर्नु भनेको प्रतिफल नपाउनु हो भन्ने सन्देश रेटिङबाट आएका कारण हकप्रद बिक्री गर्न कठिन हुने देखिएको छ ।
