काठमाडौं । बहुप्रतिक्षित चिनियाँ राष्ट्रपति सि जिनपिङको नेपाल भ्रमण यस साता हुने भएको छ । साताको अन्त्यमा शनिबार काठमाडौं उत्रने चिनियाँ राष्ट्रपति एक रात काठमाडौंमा बिताएर भोलिपल्ट स्वदेश फर्कनेछन् । चिनियाँ राष्ट्रपति सिको नेपाल भ्रमणलाई राष्ट्रिय र अन्तर्राष्ट्रिय रुपमा निकै महत्वका साथ हेरिएको छ । नेपाल सरकारले चिनियाँ राष्ट्रपति सिको नेपाल भ्रमणको तयारी तीव्र गतिमा एक सातायता गर्दै आएको थियो ।
राष्ट्रपति विद्यादेवी भण्डारीको निमन्त्रणामा आउन लागेका चिनियाँ राष्ट्रपति सि जिन पिङको नेपाल भ्रमण शनिबार अपरान्ह १२ बजेको आसपासमा काठमाडौं आईपुग्नेछन् भने आइतबार अपरान्ह नेपालबाट स्वदेश फर्कने कार्यक्रम छ । चिनियाँ राष्ट्रपति सिलाई पाँच तारे होटल सोल्टीमा राखिनेछ भने त्यहाँबाट शितल निवाससम्म जेडप्लसको सुरक्षा घेरामा पुर्याई राष्ट्रपति विद्यादेवी भण्डारीसँग भेटवार्ता हुनेछ । त्यस्तै नेपाल र चीन बीच औपचारिक वार्ता समेत हुन । सो क्रममा केरुङ–काठमाडौं रेल्वेसहित बेल्ट एण्ड रोड इनिसिएटिभ (बीआरआई)का केही नेपाल प्रस्तावित परियोजनामा सम्झौता गर्ने तयारी गरिएको छ । सो क्रममा प्रधानमन्त्री केपी शर्मा ओली, नेकपा (नेकपा)को अध्यक्षको हैसियतमा प्रचण्ड, माधव कुमार नेपाल, भलनाथ खनाल, प्रमुख प्रतिपक्ष दलका नेता तथा नेपाली कांग्रेसका सभापति शेरबहादुर देउवालगायतका राजनीतिक नेतृत्वले समेत भेटवार्ता गर्नेछ ।
राष्ट्रपति सि जिनपिङको भ्रमणलाई रणनीतिक रुपमा समेत हेरिएको छ । शुक्रबार भारत जान लागेका राष्ट्रपति जिनपिङ त्यहाँ एक रात बिताएर भोलिपल्ट काठमाडौंमा उत्रनेछन् । काठमाडौंमा एक रात विताएर स्वदेश फर्कने कार्यकालिता तय भएको छ ।
