काठमाडौं । नेपाल एसबीआई बैंकको पछिल्लो ५ वर्षको लाभांश वितरण प्रवृत्तिलाई हेर्दा बैंकले पुँजी वृद्धिभन्दा नगद प्रतिफल (क्यास डिभिडेन्ड) लाई बढी प्राथमिकता दिएको स्पष्ट देखिन्छ।
विगत ५ वर्षमा बैंकले कुल ४६.०४ प्रतिशत लाभांश घोषणा गरेकोमा नगद लाभांश २७.९९ प्रतिशत छ भने बोनस शेयर १८.०५ प्रतिशतमात्र रहेको छ। यसले गर्दा बैंकको ५ वर्षको औसत वार्षिक लाभांश ९.२१ प्रतिशत कायम भएको छ। जसमा ५.६० प्रतिशत नगद र ३.६१ प्रतिशत बोनस शेयर समावेश छ।
वर्षगत रुपमा हेर्दा आर्थिक वर्ष २०७७।७८ मा बैंकको लाभांश इतिहास पछिल्लो ५ वर्षकै न्यून विन्दु अर्थात् कुल ५.३१ प्रतिशतमा सीमित भएको थियो। जसमा ३.५ प्रतिशत बोनस र १.८१ प्रतिशत नगद लाभांश थियो। त्यसपछिका ३ आर्थिक वर्ष (२०७८।७९, २०७९।८० र २०८०।८१) मा बैंकले लगातार १० प्रतिशतभन्दा माथिको स्थिर प्रतिफल वितरण गर्यो। आर्थिक वर्ष २०७८।७९ मा १०.५३ प्रतिशत, २०७९।८० मा १०.५५ प्रतिशत र २०८०।८१ मा १०.६५ प्रतिशत लाभांश वितरण गरेको थियो।
आर्थिक वर्ष २०८१।८२ को लाभांश भने अघिल्ला ३ वर्षको दोहोरो अंकको ट्रेन्डभन्दा केही घटेर ९ प्रतिशतमा झरेको छ। उक्त वर्ष बैंकले ४ प्रतिशत बोनस शेयर र ५ प्रतिशत नगद लाभांश वितरण गरेको हो।
