काठमाडौं । सरकारले समयमै काम पूरा नगर्ने १८ वटा निर्माण तथा आपूर्तिकर्ता कम्पनीलाई स्पष्टीकरण सोधेको छ।
सार्वजनिक खरिद अनुगमन कार्यालयले काम पूरा नगरी ढिलासुस्ती गर्ने १८ कम्पनीलाई ७ दिनभित्र लिखित स्पष्टीकरण माग गरेको हो।
विभिन्न सार्वजनिक निकायले ती कम्पनीलाई कालोसूचीमा राख्न कार्यालयसमक्ष सिफारिस गरेका छन्। कार्यालयले भने ती कम्पनीलाई कालोसूचीमा राख्नु नपर्ने आधार प्रमाणसहित स्पष्टीकरण पेस गर्न निर्देशन दिएको छ।
यसअघि पनि कार्यालयले ती कम्पनीलाई ३० दिनभित्र लिखित स्पष्टीकरण मागेको थियो। तर, स्पष्टीकरण पेस नगरेकोले पुनः ७ दिनको समय दिइएको हो।
तोकिएको म्यादभित्र चित्तबुझ्दो स्पष्टीकरण नआए कालोसूचीमा राखिने कार्यालयले जनाएको छ।
