काठमाडौं । नेपाल वायुसेवा निगमले चालु आर्थिक वर्षको असोज मसान्तसम्मको जहाज खरिदको ऋण भुक्तानी गरेको छ।
निगमले अन्तर्राष्ट्रिय उडानका लागि खरिद गरेका दुई न्यारोबडी र दुई वाइडबडी जहाजका लागि कर्मचारी सञ्चय कोष र नागरिक लगानी कोषबाट लिएको ऋण दायित्वमध्ये दुई न्यारोबडी जहाजको असोज महिनाको किस्ताबापत पूरा र दुई वाइडबडी जहाजकोे आंशिक गरी ५३ करोड ९ लाख ५५ हजार २८१ रकम भुक्तानी गरेको हो।
निगमको व्यवस्थापन वर्तमान नेतृत्वले सम्हालेपश्चात निगमले चालु वर्षको असोजसम्मको अवधिमा ६ अर्ब ३२ करोड ८५ लाख ९७ हजार ५३३ रुपैयाँ किस्ता रकम भुक्तानी गरेको छ।
यसका साथै, विश्वव्यापी कोरोना भाइरसका कारण निगमको व्यापारमा समेत प्रतिकुल असर परेकोले सो असर रहेको अवधिको ब्याज, ब्याजको ब्याज, हर्जाना र पेनल छुट गरी सहयोग गरिदिन एवं किस्ताको संख्या वृद्धि गरेर ऋण दायित्व भुक्तनीलाई सहजीकरण गरिदिनसमेत निगमले कर्मचारी सञ्चय कोष र नागरिक लगानी कोषलाई अनुरोध पत्र पठाएको छ। यस सम्बन्धमा छलफलसमेत भइरहेको निगमले जनाएको छ।
