काठमाडौं । नेपाल आयल नियमले पेट्रोलियम पदार्थको मूल्य बढाएको छ।
निगमले आज राति १२ बजेदेखि लागू हुने गरी प्रतिलिटर पेट्रोलको मूल्य १ रुपैयाँ तथा डिजेल र मट्टीतेलको मूल्य ४ रुपैयाँको दरले बढाएको हो। भारतले मूल्य बढाएर पठाएसँगै निगमले पनि पेट्रोलियम पदार्थको मूल्य बढाएको हो।
अब तेस्रो वर्गअन्तर्गतका सहर काठमाडौं, पोखरा र दीपायलमा प्रतिलिटर पेट्रोलको मूल्य १५९ रुपैयाँ, दोस्रो वर्गअन्तर्गतका सुर्खेत र दाङमा १५८ रुपैयाँ र पहिलो वर्गअन्तर्गतका बाँकी क्षेत्रमा १५६.५० रुपैयाँ कायम भएको छ।
यसैगरी तेस्रो वर्गअन्तर्गतका सहरहरुमा प्रतिलिटर डिजेल र मट्टीतेलको मूल्य १५१ रुपैयाँ, दोस्रो वर्गअन्तर्गतका सहरमा १५० रुपैयाँ र पहिलो वर्गअन्तर्गतका सहरमा १४८.५० रुपैयाँ कायम भएको छ।
