काठमाडौं । मध्य भोटेकोशी जलविद्युत कम्पनीको ५ करोड १३ लाख कित्ता बढी शेयरको लकइन अवधि सकिन लागेको छ।
कम्पनीले आज एक सूचना प्रकाशित गरी आउँदो कात्तिक ११ गतेबाट ५ करोड १३ लाख ६० हजार कित्ताको लकइन सकिने जानकारी गराएको छ। त्यसपछि यो शेयर कारोबारमा आउनेछ।
कम्पनीले आइपीओ निष्कासन गरेर बाँडफाँट गरेको मिति २०७८ कात्तिक १२ गतेबाट संस्थापक, कर्मचारी र स्थानीयको शेयर ३ वर्षका लागि लकइनमा राखेको थियो। लकइनमा संस्थापक शेयरधनीको ३ करोड ६ लाख कित्ता, कर्मचारी सञ्चय कोषमा रकम जम्मा गरेका सञ्चयकर्ता कर्मचारीको १ करोड १७ लाख कित्ता, संस्थापक शेयरधनी संस्थाका कर्मचारीको २१ लाख कित्ता, ऋणदाता संस्था (कर्मचारी सञ्चय कोष)का कर्मचारीको ६ लाख कित्ता, आयोजना प्रभावित सिन्धुपाल्चोक जिल्लाका स्थानीयको ६० लाख कित्ता र कम्पनीका कर्मचारीको ३ लाख ६० हजार कित्ता रहेको छ।
कम्पनीको सञ्चालक समितिका पदाधिकारी तथा उच्च व्यवस्थापन तहमा रहेका कर्मचारीले भने खरिदबिक्री गर्न पाउने छैनन्।
