काठमाडौं । सरकारी कार्यालयका कर्मचारीका लागि खाजाको समय कटौती गरिएको भन्दै प्रधानमन्त्री केपी शर्मा ओलीले व्यक्तिगत फेसबुक पेजमार्फत् घोषणा गरे । उनले एक घण्टाको समयलाइ कटौती गरेर आधा घण्टामा सीमित बनाइएको भन्दै खाजाको समय दिउँसो १ः३० देखि २ बजेसम्म तोकिएको घोषणा गरेका हुन् ।
प्रधानमन्त्री ओलीले सेवाग्राही सुविधाका लागि सरकारी कर्मचारीको खाजाको समय आफूले आधा घण्टा कटौती गरेको दाबी गरेका हुन् । उनले कर्मचारीले खाजाका लागि आधा घण्टाभन्दा बढी सेवा अवरूद्ध पारे हेल्लो सरकारमा गुनासो गर्न सर्वसाधारणसँग अनुरोध समेत गरेका छन् ।
सस्तो लोकप्रियताका लागि चिनिएका प्रधानमन्त्री ओलीले खाजाको समय कटौती गरिएको घोषणा गर्नु ७ महिना अघि नै मन्त्री परिषदले खाजाको समय आधा घण्टा तोकि सकेको थियो ।
तत्कालीन प्रधानमन्त्री पुष्प कमल दाहाल नेतृत्वको मन्त्री परिषदले खाजा समय आधा घण्टा निर्धारण गरेको हो । मन्त्री परिषदको निर्णयका आधारमा २०८० माघ २९ गते नेपाल राजपत्र भाग ५ मा प्रकाशित २०८१ सालको चाडपर्व तथा बिदा सम्बन्धी सूचनामा सरकारी कार्यालयका कर्मचारीको खाजा समय दिउँसो १ः३० देखि २ बजेसम्म निर्धारण गरिएको छ।
खाजा समय आधा घण्टा भएपनि सरकारी कार्यालयका कर्मचारीले जबरजस्ती एक घण्टा खाजा समयमा बिताउने गरेका थिए । यस्तो हुँदा यातायात व्यवस्था कार्यालय, मालपोत कार्यालय,राजश्व कार्यालय, अध्यागमन विभाग, अस्पताल लगायतका सर्वसाधारणको अधिक भीड हुने कार्यालयका सेवाग्राहीलाई समस्या हुँदै आएको छ।
