काठमाडौं । शेयर बजार लयमा फर्किने थालेपछि सरकारलाई पनि फाइदा भएको छ।
चालु आर्थिक वर्ष २०८१।८२ को पहिलो महिना साउनमा सरकारले पुँजीगत लाभकरबापत लगानीकर्ताबाट सवा ४ अर्ब रुपैयाँ राजस्व संकलन गरेको हो।
सीडीएससीको तथ्यांकअनुसार साउनमा शेयर लगानीकर्ताले पुँजीगत लाभकरबापत ४ अर्ब २३ करोड ७८ लाख रुपैयाँ सरकारलाई तिरेका छन्। गत आर्थिक वर्ष २०८०।८१ को साउनमा शेयर लगानीकर्ताले ४० करोड ८ लाख रुपैयाँमात्रै पुँजीगत लाभकर बुझाएका थिए।
शेयर बजारमा आफूले शेयर बिक्री गर्दा आउने फाइदाबापत सरकारलाई पुँजीगत लाभकर तिर्नुपर्छ। हाल अल्पकालीन लगानीकर्ताले नाफाको ७.५ प्रतिशत, दीर्घकालीन लगानीकर्ताले ५ प्रतिशत र संस्थागत लगानीकर्ताले १० प्रतिशत पुँजीगत लाभकर तिर्दै आएका छन्।
शेयर किनेको १ वर्षभित्र बेच्नेलाई अल्पकालीन र १ वर्षपछि बेच्नेलाई दीर्घकालीन लगानीकर्ताका रुपमा परिभाषित गरिएको छ।
गत आर्थिक वर्षमा शेयर लगानीकर्ताले पुँजीगत लाभकरबापत ५ अर्ब ५० करोड ७७ लाख रुपैयाँ सरकारलाई राजस्व तिरेका थिए।
