काठमाडौं । अपर तामाकोशी जलविद्युतले गत आर्थिक वर्ष २०८०।८१ को अपरिष्कृत वार्षिक वित्तीय विवरण सार्वजनिक गरेको छ।
वित्तीय विवरणअनुसार कम्पनीले समीक्षा वर्षमा २ अर्ब ६८ करोड ६८ लाख रुपैयाँ घाटा व्यहोरेको छ। अघिल्लो वर्ष पनि कम्पनीले ४ अर्ब ९ करोड ८२ लाख रुपैयाँ घाटा व्यहोरेको थियो। समीक्षा वर्षमा कम्पनीको घाटा घटेको छ।
समीक्षा वर्षमा कम्पनीको सञ्चालन मुनाफा ३ अर्ब ९७ करोड ९७ लाख रुपैयाँ रहेको छ। अघिल्लो वर्ष कम्पनीको सञ्चालन मुनाफा ३ अर्ब १० करोड १० लाख रुपैयाँ थियो। सञ्चालन मुनाफा २८.३३ प्रतिशतले बढेको छ।
कम्पनीको विद्युत बिक्रीबाट हुने आम्दानी बढेर ८ अर्ब ७५ करोड २० लाख रुपैयाँ भएको छ। अघिल्लो वर्ष कम्पनीको आम्दानी ८ अर्ब १० करोड ९२ लाख रुपैयाँ थियो। विद्युत बिक्रीबाट हुने आम्दानी ७.९२ प्रतिशतले बढेको छ।
चुक्तापुँजी २१ अर्ब १८ करोड रुपैयाँ रहेको कम्पनीको शेयर प्रिमियममा ९१ करोड ३७ लाख रुपैयाँ रहेको छ भने रिटेन्ड अर्निङ १० अर्ब ४ करोड ६७ लाख रुपैयाँले ऋणात्मक रहेको छ।
कम्पनीको वार्षिकीकृत प्रतिशेयर आम्दानी (ईपीएस) १२.६९ रुपैयाँले ऋणात्मक रहेको छ। अघिल्लो वर्ष पनि ईपीएस ३८.७० रुपैयाँले ऋणात्मक थियो। कम्पनीको प्रतिशेयर नेटवर्थ ५६.८८ रुपैयाँ रहेको छ।
