काठमाडौं । प्रतिनिधिसभाको अर्थ समितिले शेयर बजार सुधारको कार्ययोजना १५ दिनभित्र पेस गर्न निर्देशन दिएको छ।
नेपालको पुँजीबजारसम्बन्धी समसामायिक विषयमा छलफल गर्न धितोपत्र बोर्डले देखेका समस्या र समाधानका उपायलगायत अन्य सम्बन्धित विषयमा अर्थ समितिका सदस्य र धितोपत्र बोर्डका अध्यक्षलगायत अन्य पदाधिकारीसँग भएको छलफलपछि यस्तो निर्देशन दिइएको हो।
धितोपत्र बोर्डसँग सम्बन्धित कानुनी एवं अन्य सुधारका पक्षसहितको कार्ययोजना १५ दिनभित्र अर्थ समितिसमक्ष पेस गर्न निर्देशन दिइएको छ।
यसैगरी पुँजीबजार संवेदनशील क्षेत्र भएको र आमलगानीकर्ताको आर्थिक पक्षसँग प्रत्यक्ष सरोकार राखे हुनाले बजारलाई प्राकृतिक लयमा चल्ने वातावरण तयार गर्न सबै सरोकारवालाहरुको ध्यानाकर्षण गर्ने पनि समितिले निर्णय गरेको छ।
सबै मिलेर पुँजीबजारलाई थप मजबुत, पारदर्शी र दिगो बनाउनतर्फ लाग्नुपर्नेमा समितिले जोड दिएको छ। समितिले लामो समयदेखि रिक्त रहेको नेपाल धितोपत्र बोर्डको अध्यक्षको पदमा उपयुक्त र योग्य व्यक्तिलाई तत्काल नियुक्त गर्न निर्देशन पनि दिएको छ।
