काठमाडौं । निजी क्षेत्रको तेस्रो ठूलो हवाई सेवा प्रदायक श्री एयरलाइन्सले खरिद गरेको बम्बार्डियर ड्यास एट क्यु फो हण्ड्रेड(Dash 8 Q400) विमान अमेरिकाबाट नेपालका लागि प्रस्थान गरेको छ।
गत चैत्र महिनामा अमेरिकाबाट दुईवटा बम्बार्डियर ड्यास एट विमान भित्र्याएको श्री एयरले थप एकवटा विमान भित्र्याएको हो । योसँगै श्री एयरसँग जहाज विमान संख्या ११ पुगेको छ ।
9N-AOM संकेत चिन्ह पाएको नयाँ भित्र्याउन लागिएको विमान बुधबार अमेरिकाको गुज बे बाट प्रस्थान गरेको हो । श्री एयरका क्याप्टेनद्वय रितेश कर्ण र विराज राजवंशीको नेतृत्वमा विमान ल्याइँदैछ । गत चैत्र महिनामा समेत यी दुबै क्याप्टेनको नेतृत्वमा ड्यास ४०० मोडलका दुईवटा विमान श्री एयरले अमेरिकाबाट नेपाल भित्र्याएको थियो । नयाँ विमान आइतबार बिहानसम्म त्रिभूवन अन्तर्राष्ट्रिय विमानस्थलमा अवतरण गर्ने अनुमान गरिएको छ ।
क्यानेडामा उत्पादन गरिएको उत्पादक संकेत नम्बर ४३४७ रहेको यो नयाँ विमान श्री एयरले अमेरिकाको होराइजन एयरसँग खरिद गरेको हो । यसअघिका दुई विमान समेत सोही कम्पनीसँग खरिद गरेको थियो । नयाँ खरिद गरिएको विमानको पृष्ठभूमी हेर्दा यो विमान १३ वर्ष ६ महिना पुरानो विमान हो ।
यसअघि पनि श्री एयरले २०१९ र २०२२ मा २-२ वटा बम्बार्डियर ड्यास–८ क्यू४०० विमान खरिद गरेको थियो । श्री एयरको बेडामा हाल दुईवटा सिआरजे २००, दुईवटा सिआरजे ७००, र ६ वटा क्यु ४०० टर्बोप्रप विमान छन्।
