काठमाडौं । नेपाल बीमा प्राधिकरणले सबै बीमा कम्पनीहरुलाई गुनासो सुन्ने अधिकारी नियुक्त गर्न दिएको निर्देशन कार्यान्वयन नभएपछि पुनः ताकेता गरेको छ ।
प्राधिकरणको निर्देशनपछि सीमित संख्याका बीमकले मात्र गुनासो सुन्ने अधिकारीको नियुक्ति गरेपछि प्राधिकरणले बाँकी बीमकलाई कारवाहीको चेतावनी सहित ताकेता गरेको हो । प्राधिकरणका अनुसार जीवन, निर्जीवन र लघु बीमकसमेत ३२ वटा कम्पनीले गुनासो सुन्ने अधिकारी नियुक्ति गरेका छैनन् ।
असार ७ गतेसम्म नियुक्ति गरी बीमकको वेबसाइट र प्राधिकरणको एकीकृत सूचना प्रणालीमा सोको जानकारी प्रकाशन नगरेमा कारवाही गर्ने चेतावनी प्राधिकरणले दिएको छ । प्राधिकरणले नियुक्ति सम्बन्धी विवरण पेश नगरिएको अवस्थामा असार १४ गतेभित्र लिखितरुपमा जानकारी नगराए बीमा ऐन २०७९ को दफा १३८ आकर्षित हुने भन्दै सचेत गराएको छ ।
