काठमाडौं, वैशाख १६ । साताको पहिलो दिन आइतबार सेयर बजार परिसुचक नेप्से घटेर बन्द भएको छ । गतसाताको दोस्रो दिन देखि लगातार झरेको नेप्से आज ८ दशमलव २१ अंकले घटेर १ हजार सय ४९ दशमलव ०१ को बिन्दुमा पुगेर बजार बन्द भएको छ ।
परिसुचकसँगै आइतबार रकममा पनि गिरावट आएको छ । गतसाताको अन्तिम दिन ६३ करोड रुपैयाँको सेयर किनबेच भएको बजारमा आज १६१ कम्पनीको ४० करोड ३५ लाख ३८ हजार ६८ रुपैयाँको सेयर किनबेच भएको छ । कारोबार रकम अघिल्लो दिनको भन्दा २८ प्रतिशतभन्दा बढीले कमी हो ।
यस दिन दशसमुहहरुमध्ये पाँच वटा समुह बढेका छन् भने पाँच समूह घटेको देखिन्छ जसमध्ये बैंकिङ समूह सबैभन्दा उच्च अंकले झरेको छ । सबैजसो वाणिज्य बैंकको तेस्रो त्रैमासिक रिपार्ट सार्वजानिक भइसकेको अवस्थामा बैंकहरुमा लगानीकर्ताको आकर्षण घट्न गएको देखिन्छ । त्यस्तै अन्य समूह ८ दशमलव ७ अंकले, फाइनान्स समुह ५ दशमलव ८१ अंक, लघुवित्त समुह ४ दशमलव ०७ अंक र जलविद्युत समुह १ दशमलव २३ अंकले घटेका छन् ।
आज सबैभन्दा बढी होटल समुह ३५ दशमलव १८ अंकले बढेको छ । त्यस्तै उत्पादक तथा प्रशोधन समुह ८ दशमलव १८ अंक, विकास बैंक समुह ४ दशमलव ४३ अंक, बीमा समुह २ दशमलव ४१ अंक र ट्रेडिङ समुह शुन्य दशमलव ७६ अंकले बढेका छन् ।
सर्वाधिक कमाउनेमा स्वदेशी, गुमाउनेमा बरुण हाइड्रो
आइतबारको बजारमा सवाधिक मुनाफा कमाउने स्वदेशी लघुवित्त वित्तीय संस्थाका सेयरधनी रहेका छन् । आज कम्पनीको सेयर मूल्य ९ दशमलव ९४ प्रतिशत रहेको छ । त्यस्तै नयाँ नेपाल लघुवित्त वित्तीय संस्थाको सेयर मूल्य ५ दशमलव ४३ प्रतिशत रहेको छ । त्यस्तै गरी सर्वाधिक गुमाउनेमा बरुण हाइड्रोपावरका लगानीकर्ता रहेका छन् । कम्पनीको सेयर मूल्य ७ दशमलव ७७ प्रतिशत झरेको छ ।
