काठमाडौं । नेपाल बीमा प्राधिकरणले बैंकहरुको मुद्दति निक्षेपमा लगानी गर्ने भएको छ।
प्राधिकरणले पुस ६ गते एक सूचना प्रकाशित गर्दै विभिन्न वाणिज्य बैंक तथा विकास बैंकहरुको मुद्दति निक्षेपमा लगानी गर्नेबारे जानकारी गराएको हो। इच्छुक बैंकहरुले आफूले दिन सक्ने अधिकतम प्रतिफल उल्लेख गरी ७ दिनभित्र सिलबन्दी बोलपत्र पेस गर्न आह्वान गरेको छ।
पेस हुन आएका सिलबन्दी दरभाउपत्रको मान्य अवधि कम्तीमा १५ दिनको हुने प्राधिकरणले स्पष्ट पारेको छ।
प्राधिकरणले मुद्दति निक्षेपमा उपलब्ध गराउन सक्ने अधिकतम ब्याजदर, अन्तिमपटक प्रकाशित त्रैमासिक वित्तीय विवरण, विगत ३ वर्षको नाफा–नोक्सान, बैंकको निष्क्रिय सम्पत्ति, बैंकको कर्जा–निक्षेप अनुपात, स्थापना भएको वर्ष र पुँजी पर्याप्तता कोषजस्ता विवरण बैंकहरुले पेस गर्नुपर्ने जनाएको छ।
