काठमाडौं । सरकारले मर्जर र एफपीओमा कर लगाउने निर्णय लागू हुँदा आज शुक्रबार एकैदिन ११ अर्ब रुपैयाँ बढी राजस्व संकलन भएको छ।
सर्वोच्च अदालतले बिहीबार मर्जर र एफपीओमा कर असुल्ने सरकारको निर्णयलाई सदर गरेपछि कर उठाउने बाटो खुलेको थियो। यो निर्णय बैंक बैंक तथा बीमा कम्पनीहरुले आज एकैदिन ११ अर्ब ३ करोड रुपैयाँ कर जम्मा गरेको अर्थ मन्त्रालयले जनाएको छ।
आन्तरिक राजस्व विभागको आग्रहमा नेपाल राष्ट्र बैंकले आज एक सूचना जारी गर्दै भोलि शनिबार पनि राजस्व संकलन गर्ने सबै बैंकहरुको शाखा र काउन्टर खुला गर्न आज निर्देशन दिइसकेको छ।
अर्थमन्त्री डा. प्रकाशशरण महतले सुझबुझ पूर्ण निर्णय गर्दै चालु आर्थिक वर्ष २०८०/८१ को आर्थिक विधेयकमा एफपीओ र मर्जरको आयमा कर लाग्ने व्यवस्था गरेका थिए। यसरी संवैधानिक व्यवस्थाविपरीत नयाँ कर लगाएको र भूतप्रभावी कानुन ल्याएर लगानीको वातावरण बिगारेको भन्दै आर्थिक विधेयकको दफा २६ र २७ नम्बरको बुँदा बदर गर्न माग गर्दै १६ वाणिज्य बैंकले गत भदौ २९ गते सर्वोच्चको संवैधानिक इजलाशमा संयुक्त रिट दायर गरेका थिए।
सरकारको उक्त निर्णयविरुद्ध परमादेश माग गर्दै बैंकर र बीमकले सर्वोच्चमा रिट दायर गरेका थिए। यसरी सरकारले कर उठाउन पाएको अवस्थामा बजारबाट सरकारलाई करिव ४० अर्व रुपैयाँ कर उठ्ने बताइएको छ।
