काठमाडौं । उच्च अदालत पाटनले एनसेलको शेयर खरिदविक्री भएको सम्बन्धमा अभिलेखीकरण नगर्न बिहीबार आदेश दिएको छ।
उच्च अदालतका न्यायाधीश पुरुषोत्तमप्रसाद ढकालको इजलासले विपक्षी बनाइएको कम्पनी रजिस्ट्रारको कार्यालयको नाममा शेयरको अभिलेखीकरण नगर्न अल्पकालीन अन्तरिम आदेश जारी गरेको हो। गोकुलबहादुर रोकायाले दायर गरेको रिटमा उच्च अदालतबाट जारी आदेशमा एनसेलको शेयर खरिदबिक्री भएको भए पनि त्यस्तो खरिदबिक्रीको अभिलेखीकरण र शेयर नामसारी नगर्न भनिएको छ।
यसअघि यिनै निवेदक रोकायाले दायर गरेको एनसेलको शेयर बिक्रीसम्बन्धी रिटमा अदालतले आगामी मंसिर २५ गतेका लागि अन्तरिम आदेश छलफलका लागि बोलाएको थियो। यस रिटमा पनि मंसिर २५ गतेसम्मका लागि अल्पकालीन अन्तरिम आदेश जारी गर्दै अन्तरिम आदेशको निरन्तरताका लागि छलफलमा बोलाएको छ।
यो आदेशसँगै एनसेलको बिक्री भइसकेको शेयर तत्कालै नामसारी नहुने भएको छ।
