काठमाडौं । शेयर बजार आज दोहोरो अंकले बढेको छ। नेप्से परिसूचक ११.७३ अंकले बढेर १८५२.७७ को विन्दुमा बन्द भएको छ । बजार बढ्दा आज १७५ कम्पनीको शेयरभाउ बढेको छ भने ५७ वटाको घटेको छ। ८ वटाको स्थिर रहेको छ।
आज बजारमा पौने ३ अर्ब रुपैयाँ बढीको कारोबार भएको छ। २९९ सूचीकृत कम्पनीका ९५ लाख ५ हजार ६०८ कित्ता शेयर २ अर्ब ७९ करोड ९१ लाख ४६ हजार ४३३.९५ रुपैयाँमा किनबेच भएका छन्।
यो दिन नेप्से उपसमूहमा रहेका १२ वटा समूह बढेको छ भने व्यापार समूहमात्रै घटेको छ। आज निर्जीवन बीमा समूह सर्वाधिक २.११ प्रतिशतले बढेको छ।
बढेको बजारमा आज नेपाल पुनर्बीमा कम्पनीको संस्थापक शेयरको सर्वाधिक कारोबार भएको छ। यो शेयरको ८६ करोड ८३ लाख रुपैयाँ बढीको कारोबार भएको छ।
आज त्रिशूली जलविद्युत कम्पनीका शेयरहरु मालामाल भए। यो कम्पनीको शेयरभाउमा १० प्रतिशतको बढोत्तरीका साथ सकारात्मक सर्किट लागेको छ। समाज लघुवित्त र सिवाईसी नेपाल लघुवित्तका शेयरधनीहरु पनि धेरै कमाए। यी दुवै लघुवित्तको शेयरभाउ १० प्रतिशतको हाराहारीमा उकालो लागेको छ।
आज ग्लोबल आइएमई लघुवित्तका शेयरधनीहरुले धेरै गुमाए। यो लघुवित्तको शेयरभाउ ८ प्रतिशतको हाराहारीमा घटेको छ।
