काठमाडौं । नेपाल धितोपत्र बोर्डले नियम मिच्ने नेपाल लाइफ इन्स्योरेन्ससहित ८८ वटा सूचीकृत कम्पनीलाई कारबाही गरेको छ।
धितोपत्र बोर्डले समयमै वित्तीय विवरण नबुझाएका ती कम्पनीलाई नगद जरिवानासहितको कारबाही गरेको हो। धितोपत्र बोर्डले आर्थिक वर्ष २०७९/८० को चौथो त्रैमासिक विवरण ढिलो बुझाउने तथा नबुझाएका ती कम्पनीहरुलाई गत कात्तिक २० गते पत्र काट्दै १५ दिनभित्र स्पष्टीकरण पेस गर्न निर्देशन दिएको थियो। कम्पनीहरुबाट चित्तबुझ्दो जबाफ नआएपछि कारबाहीस्वरुप ५० हजार रुपैयाँदेखि १ लाख रुपैयाँसम्म नगद जरिवाना गरिएको धितोपत्र बोर्डका एक उच्च अधिकारीले जानकारी दिए।
धितोपत्र बोर्डले ६९ कम्पनीलाई ढिला वित्तीय विवरण बुझाएकोमा जनही ५० हजार रुपैयाँका दरले जरिवाना तिराएको छ । वित्तीय विवरण नबुझाएका १९ कम्पनीलाई भने जनही १ लाख रुपैयाँका दरले जरिवाना गरिएको छ।
कारबाहीमा पर्ने अधिकांश कम्पनी लघुवित्त र जलविद्युत समूहका छन्। केही अरु समूहका कम्पनीहरु पनि कारबाहीमा परेका छन्।
धितोपत्र बोर्डको पहिलोपटक यति ठूलो संख्यामा कम्पनीहरुलाई कारबाही गरिएको हो। ‘अब नियमअनुसार समयमै वित्तीय विवरण नबुझाउने कम्पनीहरुमाथि कारबाही हुन्छ’, ती अधिकारीले भने।
123
