काठमाडौं । पर्यटन व्यवसायमा सुधारसँगै नेपाल भित्रिने पर्यटकको संख्या पनि बिस्तारै बढ्दै गएको छ । नेपाल पर्यटन बोर्डका अनुसार पछिल्लो १० महिनाको अवधिमा ८ लाखभन्दा बढी पर्यटक नेपाल भित्रिएका छन् ।
बोर्डका अनुसार सन् २०२३ को अक्टुबर महिनासम्ममा कुल आठ लाख नौ हजार छ सय विदेशी पर्यटक नेपाल भित्रिएका छन् । यीमध्ये हवाई मार्ग हुँदै १ लाख १७ हजार पर्यटक नेपाल भ्रमणमा आएका छन् । सन् २०२२ को पहिलो १० महिना(अक्टुबरसम्म) मा हवाई मार्गबाट जम्मा ८८ हजार ५ सय ८२ पर्यटक भित्रिएका थिए । त्यसको अघिल्लो वर्ष सन् २०१९ मा एक लाख १३ हजार आठ सय १६ पर्यटक हवाई मार्ग हुँदै नेपाल भ्रमणमा आएका थिए ।
बोर्डका अनुसार अक्टुबर महिनाको तथ्यांक अनुसार भारतीय पर्यटक शीर्ष स्थानमा रहेका छन् । अक्टुबरमा भारतबाट १८ हजार चार सय ८० पर्यटक नेपाल आए। यसैगरी दोश्राे सबैभन्दा बढी अमेरिकाबाट १४ हजार आठ सय ७९ पर्यटक भित्रिएका छन् । यसैगरी यूरोपेली मुलुक बेलायतबाट आठ हजार दुई सय १७, जर्मनीबाट पाँच हजार नौ सय ११, फ्रान्सबाट पाँच हजार दुई सय ७१, इटालीबाट दुई हजार चार सय ६७ अस्ट्रेलियाबाट छ हजार ७५, एशियाली छिमेकी चीनबाट छ हजार आठ सय ८०, दक्षिण एशियाली दुई छिमेकी मुलुकहरु बंगलादेशबाट चार हजार दुई सय ९२ र श्रीलंकाबाट दुई हजार पाँच सय ७ पर्यटक नेपाल आएका छन् ।
