काठमाडौं । चालु आर्थिक वर्षको ३ महिना ( साउन, भदौ र असोज) मा नेपालले १ करोड ८७ लाख बराबरको नेल पोलिस आयात गरेको छ । भन्सार विभागको तथ्यांक अनुसार ३ महिनामा ८ हजार ४२३ लिटर नेल पोलिस नेपाल आएको हो ।
नेपालले तीन महिनाको अवधिमा ५ देशबाट नेल पोलिस आयात गरेको छ । नेपालले चीन, भारत, दक्षिण कोरिया, ताइवान (चीन ) र टर्कीबाट नेल पोलिस आयात गर्ने गरेको छ । रकमको हिसाबले सबैभन्दा धेरै नेल पोलिस टर्कीबाट आएको छ । टर्कीबाट ७२ लाख २७ हजारको नेल पोलिस आयात हुँदा चीनबाट ६६ लाख ६३ हजारको नेल पोलिस आएको छ ।
परिमाणमा हेर्दा चीन बाट यो तीन महिनामा सर्वाधिक ५ हजार २७० लिटर आयात हुँदा भारतबाट १ हजार ८०५ लिटर आएको छ त्यस्तै टर्कीबाट १ हजार ३४४ लिटर आएको छ । यो तीन महिनाको नेल पोलिस आयातबाट राज्यले ९६ लाख ७७ हजार राजश्व संकलन गरेको छ ।
श्रोत : भन्सार विभाग
