काठमाडौं । कास्की, पोखराका कृष्ण बहादुर भट्टराईले अभिकर्ता पेशा सुरु गरेको १५ बर्ष वित्यो । समयको रफ्तारसँगै उनको अभिकर्ता यात्रा पनि निरन्तर चलिरहेको छ । १५ वटा वर्ष विते, तर कृष्णलाई भने प्रत्येक दिन यो पेशा एकदमै नयाँ लाग्छ । बीमाबारे सिकाइ र अध्ययन हिजो जस्तो थियो, आज पनि उस्तै छ । १५ वर्षअघि गुँरास लाइफ इन्स्योरेन्समा जोडिएका उनलाई वर्तमान समयमा गुँरास लाइफको राम्रो व्यवसाय गर्ने अभिकर्ताको रुपमा चिनिन्छ । अभिकर्ता मात्र नभई सिनियर एजेन्सी म्यानेजरको पद समेत सम्हाल्दै आएका उनी आफूसँगै आफ्नो टिमलाई नयाँ उचाइमा पुर्याउन निरन्तर लागि परेका छन् ।
सिनियर एजेन्सी म्यानेजर कृष्णबहादुर भट्टराई एक असल शिक्षक पनि हुन् । उनको अभिकर्ता पेशा पनि शिक्षक पेशाले जुटाइदिएको सुनौलो अवसर हो । कलेजमा बीमा शिर्षक पढाउनुपथ्र्याे, त्यसक्रममा थप जानकारी लिएर पढाउने विचारका साथ बीमाको तालिममा जोडिएका थिए उनी । उनी जोडिएको तालिममा उनले नै चिनेको एक जना शिक्षक प्रशिक्षकको रुपमा थिए । बीमा बारे राम्रो जानकारी भएको कृष्णलाई आफू पनि अभिकर्ता बनेर बीमा सचेतना दिन सक्छु भन्ने सोच आयो । तालिम सकिए लगत्तै उनले अभिकर्ता कोड लिएर काम सुरु गरे । सोहि वर्ष उनी गुँरास लाइफबाट नेपाल टप बने र नोकिया मोबाइल उपहार पाए ।
अभिकर्ता पेशामा सक्रिय रुपमा लागेका उनी तीन चार वर्ष काम गरेपछि भने ओझेलमा परे । काम नगरेपनि उनले बीमा गरिदिएका बीमितको प्रिमियम तिर्न उनी गुँरास लाइफ गइरहन्थे । उनी स्वयमले पनि गुँरास लाइफको पोलिसी खरिद गरेका थिए । जसकारण उनी गुँरास लाइफको कार्यालय पुगिरहन्थे । एक सक्रिय अभिकर्ता सेलाएको देखेपछि गुँरास लाइफको तत्कालिन क्षेत्रिय वरिष्ठ मार्केटिङ म्यानेजर श्यामप्रसाद तिमिल्सिनाले कम ब्याकको लागि अनुरोध गरिरहे । एक दुई पटक भने उनले तिमिल्सिनाको अनुरोधलाई इगनोर गरे । पछि भने उनले तिमिल्सिनासँग चियागफमा बसेर पुन काम सुरु गर्ने सोच बनाए । सोहि वर्ष असार महिनाको अन्तिम हप्ता काम गरे । उनको भाग्य भनौ अथवा कामप्रतिको लगनशीलता, एक हप्ताको कामले नै उनलाई एमडीआरटी क्वालिफाइड बनायो । जसले उनलाई कार चढ्ने मौका जुरायो भने मोबाइल ल्यापटप र टिभी समेत प्राप्त गरे । केहि दिनको कामले उनलाई कमिसन, एन्सेन्टिभ गरेर करिब १२ लाख रुपैयाँसम्म कमाउने मौका जुरायो ।
यसरी केहि वर्ष अभिकर्ता पेशाबाट ओझेल परेका उनले यसपछि भने कहिल्यै पछाडी फर्केर हेर्नु परेन । आयस्रोतको आधारमा होस् अथवा समाजले दिने मानसम्मान, अभिकर्ता पेशा उत्तिकै उत्कृष्ट छ । उनले व्यक्तिगत साथै टिममा पनि राम्रो व्यवसाय गर्दै आएका छन् । कुनै वर्ष उनी र उनको टिमले ८ करोडसम्म प्रिमियम संकलन गरेको याद छ उनलाई । हाल उनको टिममा ६० जना अभिकर्ता आवद्ध छन् । कृष्ण स्वयम ५ पटक एमडीआरर्टी क्वालिफाइड भइसकेका छन् । उनले कम्पनीले राख्ने विभिन्न टार्गेट, क्लवहरुमा समेत आफुलाई सक्षम बनाउ सफल भएका छन् । उनको टिमबाट वार्षिक ४/५ जना एमडीआरर्टी क्वालिफाइड हुने गरेका छन् । उनको टिमलाई पोखराबाट धेरै एमडीआरर्टी उत्पादन गर्ने टिमको रुपमा समेत चिनिन्छ । उनी आफ्नो टिममा सक्रिय साथै निरन्तर काम गर्ने अभिकर्तालाई बढी प्राथमिकता दिन्छन् । धेरै संख्या देखाउनेभन्दा पनि व्यवसाय राम्रो गर्ने अभिकर्तालाई आफ्नो टिममा स्वागत गर्ने गरेको उनी सुनाउँछन् ।
उनले यो सफलता भने थोरै मेहेनतले पाएका होइनन् । उनले बीमा सुरु गर्दा नेपालमा बीमा सम्बन्धि खासै जनचेतना थिएन । गाउँघरमा गएर बीमाबारे जानकारी दिने काम गर्दा निक्कै दुख पाएको सुनाउँछन् कृष्ण । अहिलेको जस्तो एन्ड्रोइट मोबाइल र ल्यापटपको प्रयोग खासै थिएन । टाइप राइटरबाट टाइप गरि प्रिन्ट गरिएको पेपरलाई प्लाष्टिकको थैलोमा पोको पारि प्रत्येक बीमितलाई सोहि पेपर देखाउँदै जानकारी दिने गर्थे । अन्य सामान्य नागरिकले हो भने अभिकर्ता बनेको दुई दिनमै काम छोड्ने उनी बताउँछन् ।
उनी एक शिक्षक भएकोले अभिकर्ता पेशामा थप सहयोग पुगेको थियो । उनले यो पेशा सुरु गर्ने बेला नेपालमा नेटवर्किङ व्यवसायको विगविगी थियो । पैसा खाएर भाग्छ भन्ने मानसिकता रहेको बेला बीमितको खल्तीबाट पैसा निकालेर बीमा गराउनु सहज काम थिएन । अन्य पुराना बीमा कम्पनीका अभिकर्ताले नयाँ कम्पनीले राम्रो बोनस नदिने, सेवा राम्रो नभएको भन्दै भाँड्ने काम पनि गरे । तर स्थानियको नजरमा शिक्षकको रुपमा चिनिएका कृष्णको कुरा सुनिदिउँ एकचोटि भनि उनको कुरा ध्यान दिएर सुन्ने उनीसँगै बीमा गर्ने क्रम बिस्तारै बढ्दै गयो । यसरी थुप्रै समस्याको बाबजुद पनि उनले यो पेशामा सफलता प्राप्त गरे । उनले अध्यापन पेशा सुरु गरेको ३१ वर्ष वितिसक्यो । अभिकर्ता र शिक्षक पेशालाई निरन्तर रुपमा अघि बढाउँदै आएका छन् कृष्णले । शिक्षक पेशा सुरु गरेदेखि नै बीमा बारे जानकारी पाएका उनी शिक्षक पदकै कारण अभिकर्ता क्षेत्रमा जमेका हुन् । यी दुई पेशामध्ये अभिकर्ता बन्नु जटिल लाग्छ उनलाई । कृष्णका अनुसार, अभिकर्ता बन्नु भनेको चुनौतीलाई स्वीकार हो ।
कृष्णको अनुभवमा अभिकर्ता पेशामा सहनशील, अनुशासित र संयमशील हुनुपर्छ । कम्पनीको बारेमा सम्पूर्ण जानकारी राख्नुपर्छ । कतिपय ग्राहकलाई धेरै पटक जानकारी दिएपनि नाई भन्ने गर्दछन् । तर अभिकर्ता संयमशील भएर निरन्तर लागि पर्ने हो भने कुनै न कुनै समय बीमा गर्न राजी हुने उनको भनाई छ । यसैपनि यो क्षेत्रलाई सम्बन्धको बजारको भनिन्छ । जति धेरै सम्बन्ध विस्तार गर्न सकयिो त्यत्ति नै धेरै जनालाई बीमा गराउन सकिन्छ । यसका लागि सम्बन्ध जोगाएर राख्न सक्नुपर्छ, विश्वासको डोरोलाई बलियो बनाउन सकियो भने यो पेशमा सजिलै जम्न सकिने कृष्ण बताउँछन् । अभिकर्ताले आफूलाई हरेक क्षेत्रमा अभ्यस्त बनाउन सक्नु उसको लागि फाइदाको कुरा हो ।
अभिकर्ता पेशाले वर्तमानसँगै भविष्यलाई पनि सुनौलो बनाउन सहयोग गर्दछ । प्रत्येक व्यक्तिको चाहना भनेको भविष्यलाई सुरक्षित बनाउनु हो । जसकारण भिकर्ताले प्रत्येक बीमितलाई सुहाउँदो पोलिसी बिक्रि गरि बीमितलाई सहयोग गर्नुपर्ने उनको भनाई छ । साथै बीमा गरिसकेपछि पनि बीमितलाई फलोअप गर्ने, प्रिमियम तिर्न सहयोग गर्ने, क्लेम सेटलमेन्ट लगाएतमा सहयोग गरेमा विश्वास बलियो भई बस्दछ । यसकारण अभिकर्ताले हमेस लगनशील र विश्वासिलो भई काम गर्नुपर्ने उनको बुझाई छ ।
