काठमाडौं । पश्चिमी मुलुक क्यानेडाले देशमा प्रवेश गर्ने आप्रवासीहरूको संख्यामा ठूलो वृद्धि गर्ने योजना सार्वजनिक गरेको छ । देशमा विद्यमान श्रम शक्तिको अभाव टार्नको लागी क्यानेडाको सरकारले सन् २०२५ सम्म प्रत्येक वर्ष ५ लाख आप्रवासी श्रमिक भित्र्याउने लक्ष्य राखेको छ ।
क्यानेडाका अध्यागमन मन्त्री सन फ्रेजरले मंगलबार आप्रवासी कामदारभित्र्याउने सरकारको नयाँ योजना सार्वजनिक गरेका हुन् । यस योजना अन्तर्गत आप्रवासी कामदारलाई स्थायी बसोबास अनुमति प्रदान गर्नेछ । साथै क्यानेडामै बसोबास गरिरहेका आप्रवासीको परिवारका थप सदस्य भित्र्याउने र कार्य कौशल र अनुभव भएका श्रमिक र शरणार्थीहरुलाई शरण दिने योजना रहेको छ । विपक्षी दल कन्जरभेटिभ पार्टीले पनि सरकारको यस कदमको स्वागत गरेको छ ।
नयाँ योजनाले नयाँ आगमनको बाढीको परिकल्पना गरेको छ । यस अन्तर्गत सन् २०२३ मा ४ लाख ६५ हजार आप्रवासी कामदार भित्र्याइनेछन् । क्रमश यो संख्या सन् २०२५ मा ५ लाख पुग्नेछ । गत वर्ष मात्र क्यानेडाको अध्यागमन विभागले ४ लाख ५ हजार आप्रवासीलाई स्थायी बसोबासको अनुमति प्रदान गरेको छ ।
