काठमाडौं, बैशाख ३ । चार बीमा कम्पनीको एक करोड ९६ लाख ६८ हजार १२८ कित्ता हकप्रद सेयर आउने भएको छ ।
नेपाल धितोपत्र बोर्डमा दिएको आवेदनका आधारमा यी कम्पनीले उक्त संख्यामा हकप्रद बिक्री गर्न लागेका हुन् । हकप्रद निष्कासन गर्नेमा नेशनल लाईफ इन्स्योरेन्स कम्पनी र तीन निर्जिवन बीमा कम्पनी रहेका छन् ।
नेशनल लाइफ इन्स्योरेन्स
नेशनल लाइफ इन्स्योरेन्स कम्पनीले १० बराबर ६ को अनुपातमा अर्थात ६० प्रतिशत हकप्रद सेयर निष्कासन गर्ने भएको छ । इन्स्योरेन्सले १०० रुपैयाँ अंकित मूल्यमा ९९ लाख ३६ हजार ४ सय ७७ कित्ता सेयर निष्कासनको अनुमतिका लागि नेपाल धितोपत्र बोर्डमा आवेदन दिएको छ ।
कम्पनीको शेयर निष्कासन तथा बिक्री प्रबन्धकमा एनआइबिएल क्यापिटल लिमिटेड रहेको छ । कम्पनीले गत कात्तिक २७ गते धितोपत्र वोर्डमा सेयर निष्कासनका लागि निवेदन दिएको थियो ।
आइएमई जनरल इन्स्योरेन्स
आइएमई जनरल इन्स्योरेन्स कम्पनीले ४३ लाख २० हजार कित्ता सेयर निष्कासन गर्ने प्रक्रिया अगाडि बढाएको छ । कम्पनीले १० बराबर ८ को अनुपातमा हकप्रद सेयर निष्कासन गर्नका लागि गत चैत्र १२ गते धितोपत्र वोर्डमा निवेदन दिएको थियो ।
कम्पनीको सेयर निष्कासन तथा बिक्री प्रबन्धकमा ग्लोवल आइएमई क्यापिटल लिमिटेड रहेको छ ।
सिद्धार्थ इन्योरेन्स
सिद्धार्थ इन्योरेन्सले चुक्तापूँजीको ३५ प्रतिशत अर्थात २२ लाख ४४ हजार ९७३ बराबरको कित्ता सेयर निष्कासन गर्न लागेको छ । आव २०७३/७४ मा २० प्रतिशत बोनस वितरण गरेको कम्पनीले १०० रुपैयाँ अंकित मूल्यमा २२ करोड ४४ लाख ९७ हजार तीन सय ५० रुपैयाँको सेयर निष्कासन गर्न लागेको हो । कम्पनीको शेयर बिक्री प्रबन्धकमा एनएमबि क्यापिटल रहेको छ ।
कम्पनीले गत पुस २८ गते सेयर निष्कासनका लागि धितोपत्र वोर्डमा निवेदन दिएको थियो ।
प्रभु इन्स्योरेन्स कम्पनी
प्रभु इन्स्योरेन्सले ४६ प्रतिशत हकप्रद सेयर बिक्री गर्ने अनुमति माग्दै धितोपत्र बोर्डमा निवेदन दिएको छ । इन्स्योरेन्सले १ः०.४६ अनुपातमा ३१ करोड ६६ लाख रुपैयाँ बराबरको ३१ लाख ६६ हजार ६७७ कित्ता हकप्रद सेयर बिक्री गर्न बोर्डमा निवेदन दिएको हो ।
बीमा समितिको निर्देशन बमोजिम हकप्रद बिक्री गर्ने प्रक्रिया अगाडि बढाएको प्रभुको हकप्रद बिक्री पश्चात चुक्तापूँजी एक अर्ब रुपैयाँ नाघ्नेछ ।
कम्पनीको शेयर निष्कासन तथा बिक्री प्रबन्धकमा प्रभु क्यापिटल लिमिटेड रहेको छ ।
एभरेष्टको हकप्रद परिमार्जन
एभरेष्ट इन्स्योरेन्सले भने हकप्रद शेयर निष्कासन अनुपात परिमार्जन गरेको छ । यसअघि प्रस्ताव गरेको १ बराबरको ६ को अनुपातमा हकप्रद निष्कासन गर्ने प्रस्ताव गरेको एभरेष्टले समितिको निर्देशन बमोजिम कम्पनीको सेयर संरचनामा न्युनतम ५१ प्रतिशत संस्थापक सेयरधनी कायम गर्ने हकप्रद सेयर संशोधन गर्ने भएको छ । गतवर्षको मुनाफाबाट १० प्रतिशत बोनस वितरण गरेको कम्पनीले बोनस पश्चात हुन आउने कुल चूक्ता पूँजीमा सेयरधनीलाई १०५ प्रतिशत संस्थापक हकप्रद सेयर जारी गर्ने भएको छ ।
सो संस्थापक हकप्रद पश्चात कायम सेयरधनीलाई थप ३०० प्रतिशत हकप्रद जारी गर्ने प्रस्ताव गरेको छ ।
यद्यपी नेपाल धितोपत्र बोर्डको वेभसाईटमा भने हालसम्म पनि एभरेष्ट इन्स्योरेन्सले १ बराबर ६ को अनुपात अर्थात ६०० प्रतिशत हकप्रद बिक्री गर्ने उल्लेख छ ।
