काठमाडौं । बिचौलियाको निर्देशनमा बजेट तयार पारेको आरोप लागेपछि अर्थमन्त्री पदबाट राजीनामा दिएका जनार्दन शर्माले आइतबार पुनः अर्थमन्त्रीको पदभार ग्रहण गरेका छन् ।
संसदीय छानबिन समितिले उनीविरुद्ध लागेको आरोप सम्बन्धमा छानबिन पछि दोषी नदेखिएको प्रतिवेदन दिएपछि प्रधानमन्त्री शेरबहादुर देउवाले शर्मालाई पुनः नियुक्त गरेका थिए । राष्ट्रपति विद्यादेवी भण्डारी समक्ष पद तथा गोपनियताको सपथ ग्रहणपछि उनले आइतबार साँझ नै सिंहदरबारस्थित अर्थमन्त्रालय पुगेर पदभार ग्रहण गरेका छन् ।
शर्माले चालू आर्थिक वर्ष २०७९/८० को बजेट निर्माणको क्रममा मध्यरातमा अर्थमन्त्रालयमा बिचौलियासँग छलफल गरेर उनकै सुझाव अनुसार बजेटमा निश्चित व्यापारी समूहको स्वार्थपूर्ती गर्ने उद्देश्यले बजेटमा कर छुटलगायतको प्रावधान राखिएको आरोप लागेको थियो ।
