काठमाडौं । बजार घट्ने क्रम आज पनि रोकिएन । बिहीबार नेप्से सूचक १८.२६ अंकले घटेर २११२.४७ अंकमा झरेको छ । सूचक सँगै कारोबार रकम पनि लगातार घटिरहेको छ । आज एक अर्ब १६ करोड रुपैयाँको कारोबार भएको छ ।
बिहीबार २२७ वटा कम्पनीको शेयर खरिद बिक्री हुँदा जम्मा ३९ वटाको मात्रै बढेको छ भने १४९ वटाको घटेको छ । आज बलेफी हाइड्रोपावरको शेयर मूल्य सर्वाधिक धेरै बढ्ने क्रममा सर्किट लागेको छ । सर्वाधिक धेरै प्रभु लाइफको ६.४७ प्रतिशलते घटेको छ । सर्वाधिक धेरै माउन्टेन हाइड्रोको १२ करोड १२ लाख रुपैयाँको खरिद बिक्री भएको छ ।
बजेट पछि शेयर बजारमा तिव्र गिरावट देखिएको छ । बजेट पछि बजार सुधार हुने अपेक्षमा रहेका लगानीकर्ताले बजेटमा कुनै पनि आकर्षक प्याकेज नपाए पछि बजार झन् तल झरेको हो । बजार घट्यो भन्दै आफु सँग भएको अलि अलि पैसा पनि एभरेजिङ गर्दा गर्दै सकिए पछि अहिले बजारमा सक्रिय लगानीकर्ताको संख्या घट्दै गएको छ । बजार सुधार हुन शेयर खरिद गर्ने लगानीकर्ता आउनु पर्छ तर अहिले सबै लगानीकर्ता शेयर खरिद गर्नै नसक्ने अवस्थामा छन् ।
