काठमाडौं । शेयर बजारका लगानीकर्ताले तेस्रो त्रैमाशिक मौद्रिक समिक्षाबाट केहि संबोधन हुने अपेक्षा गरेका थिए । तर राष्ट्र बैंकले अर्धवार्षिक समिक्षाकै व्यवस्थालाई निरन्तरता दिए पछि साताको अन्तिम कारोबार १५.८२ अंकले घटेको छ ।
राष्ट्र बैंकले मौद्रिक समिक्षा सार्वजनिक गर्नु अगाडी बढि रहेको शेयर बजार मौद्रिक समिक्षा सार्वजनिक भए लगत्तै घट्न थालेको थियो । नेप्से सूचकमा गिरावट देखिए पनि कारोबार रकममा भने केहि सुधार देखिएको छ । गएका दिनमा एक अर्ब भन्दा तल झरेको कारोबार आज भने एक अर्ब २९ करोड रुपैयाँको भएको छ ।
होटलको सूचकमा सुधार देखिए पनि बाँकी सूचकमा गिरावट आएको छ । ३८ वटा कम्पनीको शेयर मूल्य बढ्दा १४६ वटाको मूल्य घटेको छ । सर्वाधिक धेरै रुरु जलविद्युत कम्पनीको शेयर मूल्य ६.१३ प्रतिशतले बढेको छ भने सर्वाधिक धेरै दिव्यश्वरी हाइड्रोपावरको ३.७५ प्रतिशतले घटेको छ ।
सर्वाधिक धेरै कारोबार प्रभु बैंकको संस्थापक शेयर र मेगा बैंकको कारोबार भएको छ । मर्जरको हल्लाले मेगा बैंकको कारोबार बढिरहेको छ । नेप्से सूचक सर्वाधिक तल्लो विन्दुमा रहेको भन्दै लगानीकर्ताले कारोबार बढाएका छन् । अर्को तर्फ बजेटले शेयर बजारलाई केहि संबोधन गर्न सक्ने अनुमानले पनि आज शेयर कारोबार बढेको देखिन्छ ।
