काठमाडौं । रिभर फल्स पावरले प्रभावित क्षेत्रका लागि निष्काशन गरेको आइपिओमा आवेदन दिने आज अन्तिम दिन रहेको छ । कम्पनीले गत चैत २७ गतेदेखि आइपिओ निष्काशन गरेको थियो ।
कम्पनीले आयोजना प्रभावित क्षेत्र संखुवासभा जिल्लाका बासिन्दाहरुका लागि प्रतिकित्ता १०० रुपैयाँको दरमा ७ लाख कित्ता साधारण शेयर निष्काशन गरेको हो ।
आईपीओमा रिभर फल्स पावर लिमिटेडको आयोजना कार्यालय, संखुवासभा, प्राइम कमर्सियल बैंकको खाँदवारी, तुम्लिङटार र सभापोखरी शाखा, प्रभु बैंकको खाँदवारी शाखा र ग्लोबल आइएमई बैंकको खाँदवारी र चैनपुर शाखा कार्यालयबाट आवेदन दिन सकिनेछ । यसका साथै नेपाल धितोपत्र बोर्डबाट स्वीकृतिप्राप्त गरेका सम्पूर्ण सी–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ ।
कम्पनीको शेयर निष्काशन तथा बिक्री प्रबन्धक प्रभु क्यापिटल लिमिटेड रहेको छ । लगानीकर्ताले न्यूनतम १० कित्ता शेयर खरिदका लागि आवेदन दिनुपर्नेछ भने अधिकतममा एक लाख कित्तासम्मका लागि आवेदन दिन सक्नेछन् ।
