काठमाडौं । बीमा समितिले सर्लाही जिल्लाको बरहथवा नगरपालिकामा बीमा सम्बन्धि जनचेतनामुलक अन्तर्क्रिया कार्यक्रम सम्पन्न गरेको छ । बीमा समितिका अध्यक्ष सूर्य प्रसाद सिलवालले स्थानीय तह तथा सरोकारवालहरु सँग बीमाको बारेमा जानकारी गराउने अभियान सुरु गरे सँगै बीमा समितिले आज विहान बरहथवा नगरपालिकामा कार्यक्रम गरेको हो ।
कार्यक्रममा बीमा समितिका निर्देशक दिनेशलाल कर्णले बीमा सम्बन्धी आधारभुत जानकारिमुलक प्रस्तुति दिएका थिए । समितिका सहायक निर्देशक पुर्ण बहादुर थापाले स्वागत मन्तव्य दिएका थिए पनि अर्का सहायक निर्देशक हृदयश्वर पण्डितले कार्यक्रम सञ्चालन गरेका थिए ।
आजको कार्यक्रममा नगरपालिकाका मेयर देवानन्द महतो, उपमेयर सितादेवी माझी, सम्पुर्ण वडाका जनप्रतिनिधिहरु, शिक्षक, व्यवसायी, स्थानीय तहमा रहेका बीमा तथा बैंकका शाखा कार्यलाय प्रमुखहरु, किसान लगायतको उपस्थिति थियो ।
स्थानीय जनप्रतिनिधिका साथै ओरियण्टल इन्स्योरेन्सकी नायव प्रमुख कार्यकारी अधिकृत राथिका मुथुकुमारको समेत उपस्थिति थियो । उक्त कार्यक्रममा कतिपय सहभागीले बीमा समितिले हकप्रद शेयर निष्काशनका लगाएको रोकका विषयमा पनि प्रश्न गरेका थिए । सहभागी किसानले पशु बीमा गरेपछि आफ्नो पशुलाई सर्प बिच्छीले टोकेर मृत्यु भयो भने दाबी पाइन्छ कि पाइदैन भनेर प्रश्न गरेका थिए ।
मेयर देवानन्द महतोले भारतिय जीवन बीमा कम्पनीमा बीमा गर्दा आफ्नो पैसा डुबे पछि नेपालकै जीवन बीमा कम्पनीमा बीम गरिरहेको बताएका थिए । बीमा कम्पनीहरुले समयमा दाबी भुक्तानी नगर्दा आम सर्वसाधारणको बीमा प्रति विस्वास गुम्दै गइरहेको मेयर महतोले उल्लेख गरेका थिए । बीमा आर्थिक जोखिमो रक्षा बरणका लागि भएकाले यदि बीमा कम्पनीहरुले दाबी भुक्तानी गरेनन् भने बीमा समितिमा उजुरी हाल्न कर्णले आह्वान गरेका थिए ।
उपमेयर माझीले आफ्नो नगरपालिकामा बीमा सम्बन्धी नीति ल्याएर महिलाहरुलाई पनि बीमाको दायरामा ल्याउन पहल गर्ने बताएकी थिइन । स्थानीय तहलाई बीमा सम्बन्धी नीति बनाउन औपचारिक रुपमा पत्र पठाउन समेत उपमेयर माझीले अनुरोध गरेकी छिन् ।
