काठमाडौं । एनआईविएल समृद्धि फण्ड दुईको सार्वजनिक निष्काशनमा पहिलो तीन दिनमै माग भन्दा बढिको आवेदन परिसकेको छ । १० वर्ष अवधिको बन्दमुखी यस म्युचुअल फण्डले ११४ प्रतिशत लाभांस वितरण गर्ने प्रक्षेपण गरेको छ ।
फण्डले सञ्चालन भएको पहिलो वर्षमै १० प्रतिशत लाभांस दिने प्रक्षेपण गरेको छ । सुरुको वर्षमा ९७ करोड ५० लाख रुपैयाँ लगानी गर्ने योजना बनाएको यस फण्डले १० वर्ष पछि २ अर्ब १६ करोड रुपैयाँ पुर्याउने योजना बनाएको छ ।
एक अर्ब २० करोड रुपैयाँको आधार रहेको यस फण्डको न्याभ भ्यालु १० वर्ष पछि दोब्बर भन्दा बढि हुने र लगानीकर्ताले दोब्बर भन्दा धेरै रकम फिर्ता पाउने छन् । अहिले गरिएको लगानीबाट लाभांस बापत ११४ प्रतिशत र योजना समाप्ति हुँदा पनि अहिले लगानी गरेको भन्दा धेरै रकम प्राप्त गर्न सक्ने योजना व्यवस्थापकको प्रक्षेपण रहेको छ ।
यस योजनामा लगानी गर्नेले उच्चतम प्रतिफल प्राप्त गर्न सक्ने एनआईविएल एस क्यापिटलका सहायक महाप्रवन्धक सचिन्द्र ढुंगानाले जानकारी दिए । एनआईविएल एस क्यापिटलले बन्दमुखी सँग सँगै खुलामुखी योजना पनि सञ्चालन गरिरहेको छ । दोस्रो बजारबाट अधिकतम लाभ लिन सफल यस क्यापिटलले फण्ड व्यवस्थापन गरेर लगानीकर्ताहरुलाई अधिकतम प्रतिफल प्रदान गरिरहेको छ । 
