काठमाडौं । मेरो शेयरमा समस्या देखिदा मर्चेन्ट बैंकहरुमा ‘डिआइएस’ चेकको चाङ लाग्न थालेको छ । सिडिएससीले केहि दिनदेखि मेरो शेयरको अनलाइन एप्लिकेसन अपग्रेड गरिरहेको छ । एप्लिकेसन अपग्रेड गर्ने क्रममा ‘इ डिआइएस’ले काम नगर्दा लगानीकर्ताहरु मर्चेन्ट बैंकमा धाउन बाध्य भएका हुन् ।
लगानीकर्ताले शेयर बिक्री गरेको एक दिन भित्रमा राफसाफका लागि ‘इ डिआइएस’को काम गरिसक्नु पर्छ । तर लगानीकर्ताले एक दिन भित्रमा मेरो शेयरबाट ट्रान्सफर गर्न सकेनन् भने डिम्याट खाता रहेको मर्चेन्ट बैंकमै पुगेर डिआइएस चेक पेश गर्नु पर्छ । यदि समयमा शेयर ट्रान्सफर भएन भने लगानीकर्ता क्लोज आउटमा पर्छन् । क्लोज आउटमा पर्ने लगानीकर्ताले २० प्रतिशत हर्जना तिर्नु पर्छ ।
मेरो शेयरबाट सजिलै शेयर ट्रान्सफर हुँदै आएकोमा सिडिएससीले मेरो शेयरको एप्लिकेसन अपग्रेड गर्न खोज्दा समस्या देखिदै आएको छ । अपग्रेड गर्ने क्रममा कुनै कुनै समयमा मात्रै शेयर ट्रान्सफर नहुने समस्या देखिएको सिडिएससीका प्रवक्ता सुरेश न्यौपानेले जानकारी दिए ।
मेरो शेयरमा धेरै नै समस्या देखिए पछि क्षमता बढाउने तर कतिपय फिचर नै परिवर्तन गर्ने काम भैरहेको न्यौपानेले जानकारी दिए । मेरो शेयरको एप्लिकेसन एक पटकमा २५ हजारले मात्रै हेर्न सक्छन् । सिडिएससीले सर्भरको क्षमता बढाउने लगायतका कामहरु गरिरहेकाले केहि दिनमा यसको क्षमता कति रहने भन्ने थाहा हुनेछ । अवको एक हप्तामा लगभग अपग्रेडको काम सकिने न्यौपानले जानकारी दिए ।
