काठमाडौं । शुक्रवारदेखि विक्रीमा आएको सानिमा लार्ज क्याप फण्डको इकाईमा तेस्रो दिनसम्म मागभन्दा ५ दशमलव २९ गुणा बढी आवेदन परेको छ । विक्री प्रबन्धक सानिमा क्यापिटलका अनुसार आइतवार साझ ५ बजेसम्म ३६ हजार ८४० जना आवेदकहरुबाट ४५ करोड ५८ हजार १०० कित्ताको इकाई खरीदको लागि आवेदन परेको जनाएको छ ।
सानिमा क्यापिटलको व्यवस्थापनका सञ्चालन हुने यस फण्डले १ अर्ब बराबरको १० करोड इकाई विक्री खुला गरेको हो । प्रति इकाई १० रुपैयाँ अंकित दरको कुल इकाईमध्ये यस फण्डले १५ प्रतिशत इकाई कोष प्रबन्धक सानिमा बैंक र कोष व्यवस्थापक सानिमा क्यापिटलका लागि सुरक्षित राखी बाँकी ८ करोड ५० लाख कित्ता सर्वसाधारणमा सार्वजनिक निष्काशन गरेको हो ।
छिटोमा माघ १३ र ढिलोमा माघ २६ गतेसम्म विक्री खुला हुने मिति तय भएपनि मागभन्दा बढी आवेदन परिसकेकाले छिटो अवधिभित्रै विक्री बन्द हुनेछ । यो इकाई खरिदका लागि न्यूनतम १०० कित्तादेखि अधिकतम १ करोड कित्तासम्म खरिदको माग गर्न सकिनेछ । सानिमा क्यापिटलले सञ्चालन गर्न लागेको यो योजना बन्द मुखि योजना हो ।
