काठमाडौं । बुधबार नेपाल स्टक एक्सचेन्जमा नेपाल लाईफ इन्स्योरेन्स कम्पनीको ऐतिहासिक कारोबार भएको छ । आज नेपाल स्टक एक्सचेन्जमा बिरलै हुने एउटै कम्पनीको झण्डै डेढ अर्ब रुपैयाँको कारोबार भएको हो ।
बुधबार नेपाल लाईफ इन्स्योरेन्स कम्पनीको कूल एक अर्ब ४३ करोड ४४ लाख ९९ हजार ४९३ रुपैयाँको कारोबार भएको हो । आज एकै दिन पाँच लाख ६७ हजार ४२२ कित्ता शेयर कारोबार भएको छ । कारोबार रकमको आधारमा नेप्सेको इतिहासमा विरलै हुने एउटै कम्पनीको ठूलो रकमको कारोबार भएको हो । नेपाल लाईफ इन्स्योरेन्स कम्पनीले हिजो ५१ प्रतिशत लाभांश वितरण गर्ने निर्णय गरेको थियो । उक्त निर्णय बीमा समितिबाट स्वीकृत भई आगामी साधारणसभाबाट पारित भएपछि शेयरधनीहरुले प्राप्त गर्नेछन् । ठूलो मात्रामा लाभांश वितरण गर्ने निर्णय भएको तथा बुक क्लोज हुन बाँकी रहेकोले नेपाल लाईफको शेयरमा आकर्षण देखिएको छ ।
नेपाल स्टकमा नेपाल लाईफ इन्स्योरेन्स कम्पनीको कूल पाँच करोड ४९ लाख ६१ हजार ६०८ कित्ता शेयर सूचिकृत छ । बुधबारको नेपाल लाईफ इन्स्योरेन्स कम्पनीको शेयर दुई हजार ४४३ रुपैयाँमा कारोबार भएको छ । नेपाल लाईफ इन्स्योरेन्स कूल बजार पुँजिकरण एक खर्ब २९ अर्ब २१ करोड ४७ लाख ४० हजार ४०८ रुपैयाँ पुगेको छ ।
